काठमाडौँ, कार्तिक १ गते । शिक्षा, विज्ञान तथा प्रविधि मन्त्री वैज्ञानिक डा. महावीर पुनले त्रिभुवन विश्वविद्यालय (टिभी) किर्तिपुर परिसरभित्र सुन्दर पार्क निर्माणको अभियान सुरु गरेका छन्। मन्त्री भएको दोस्रो दिनमै उनले करिब ३५० रोपनी क्षेत्रफलमा फैलिएको झाडी फाँडेर सुन्दर पार्क बनाउने आह्वान गरेका थिए।
डा. पुनका अनुसार हालसम्म श्रमदानमार्फत विभिन्न स्थानबाट आएका श्रमदाताहरुले झाडीको करिब ४० प्रतिशत भाग फडानी गरी सकेका छन्। अभियान अन्तर्गत निरन्तर श्रमदान भइरहेकाले पार्क निर्माणको प्रारम्भिक चरणले गति लिएको बताइएको छ।
“झाडी फाँडी सकेपछि सुन्दर पार्क बनाउन चाहिने पैसाको व्यवस्था गर्न उपाय खोज्दैछौं। पैसा निकाल्ने उपाय हुने जो सुकैले पनि नहिच्कीच्याई भन्नु होला,” मन्त्री पुनले आफ्नो सामाजिक सञ्जालमार्फत लेखेका छन्।
उनले किर्तिपुर, ललितपुर र काठमाडौँका श्रमदाताहरुलाई पनि अभियानमा सहभागी हुन आह्वान गरेका छन्। पुनका अनुसार यो पार्क त्रिभुवन विश्वविद्यालयकै वातावरण सुधार र विद्यार्थी तथा स्थानीयवासीका लागि सामुदायिक विश्रामस्थलका रूपमा विकास गर्ने उद्देश्यले बनाइँदैछ।
