हेटौंडा, मंसिर ६ गते । बागमती प्रदेशको राजधानी हेटौंडा–१३ स्थित पदमपोखरी चोक बजार अब अन्धकारमय क्षेत्रको पहिचानबाट मुक्त हुँदै आधुनिक र उज्यालो सहरको नयाँ रूप लिन लागेको छ। सहरको सौन्दर्यसँगै सुरक्षा व्यवस्थालाई प्राथमिकतामा राख्दै चोक बजार क्षेत्रमा अत्याधुनिक प्रकाश उपकरण जडान कार्य सुरु भएको वडाध्यक्ष पेम्बा लामाले जानकारी दिएका छन्।
उनका अनुसार लामो समयदेखि योजनामा रहेको आधुनिक प्रकाश व्यवस्था अब कार्यान्वयनको अन्तिम चरणमा पुगेको छ। बजारको भित्री क्षेत्रदेखि मुख्य चोकसम्म उच्च क्षमताका LED डिजिटल बत्ती जडानसँगै दुई थान मिनी–मास्ट स्थापनाको काम तीव्र गतिमा अघि बढिरहेको छ। यसले चोक क्षेत्रलाई चौबीसै घण्टा पूर्णरूपमा उज्यालो बनाउने छ।
अन्धकारका कारण विगतमा घटना-दुर्घटना, चोरी–निकासी तथा अन्य आपराधिक गतिविधि हुने सम्भावना उच्च हुने गरेकोमा आधुनिक बत्ती विस्तारले अब त्यस्ता घटनामा ठूलाे मात्रामा कमी आउने अपेक्षा गरिएको छ। विशेषतः महिलाहरूका लागि साँझपख सुरक्षित रूपमा हिँडडुल गर्न सहज वातावरण बन्ने स्थानीयहरूको विश्वास छ।
सहरलाई उज्यालो बनाउनु पूर्वाधार विकासको महत्वपूर्ण आधारशिलामध्ये एक भएको उल्लेख गर्दै वडाध्यक्ष लामाले भविष्यमा पनि यस्तै प्रविधिमुखी विकास कार्यलाई निरन्तर अघि बढाइने बताए। उनले नगरप्रमुख तथा कार्यपालिका सदस्यहरूले दिएको सहयोगका लागि आभार व्यक्त गर्दै अभियान सफल बनाउन स्थानीयवासीहरूको निरन्तर सहकार्य आवश्यक रहेको उल्लेख गरे।
आधुनिक प्रकाश व्यवस्था सञ्चालनमा आएपछि पदमपोखरी चोक बजार अब अन्धकार होइन, उज्यालो, सुरक्षित र व्यवस्थित सहरको नयाँ पहिचानका साथ अघि बढ्नेछ।
