भीमफेदी, मंसिर २५ गते । जिल्ला प्रहरी कार्यालय मकवानपुरबाट खटिएको विशेष प्रहरी टोलीले भीमफेदी गाउँपालिका अन्तर्गत कालिकाटार–नामटार क्षेत्रबाट ठूलो परिमाणको प्रतिबन्धित लागू औषध गाँजा बरामद गरेको छ।
गोप्य सूचनाका आधारमा निगरानीमा रहेको टोलीले मङ्सिर २५ गते बिहान १ बजे शंका लागेपछि रोक्न खोजिएको बा १७ च ४२ नम्बरको बोलेरो पिकअप गाडी रोक्न नमानेपछि पछ्याउँदै गएको थियो।
गाडी चालकमाथि नियन्त्रण स्थापित गर्न खोज्दा पिकअप गाडी भीमफेदी–३ पान्द्राङतर्फको ढुङ्गा खानी जाने भित्री बाटोतिर लैजान पुगिएको र त्यहीँ चालक फरार भएको प्रहरीले जनाएको छ। पछि गरिएको चेकजाँचमा गाडीको पछाडि ढालामा राखिएका १७ बोरा भित्र रातो प्लास्टिकले बाँधिएका ५० पोकामा जम्मा ४७० किलो गाँजा फेला परेको जिल्ला प्रहरी कार्यालय मकवानपुरले जनाएको छ।
बरामद गरिएको गाँजा तथा बोलेरो पिकअप गाडीलाई नियन्त्रणमा लिइ आवश्यक कारबाही अगाडि बढाइएको छ। साथै फरार गाडीचालक, सवारी धनी तथा सो कार्यमा संलग्न व्यक्तिहरूको खोजी कार्य जारी रहेको सूचना अधिकारी प्रहरी निरीक्षक राजु प्रसाद कुर्मीले जानकारी दिएका छन्।
