हेटौंडा, असार २४ गते । सेवा सहयोग र आवाजका अध्यक्ष तथा सामाजिक अभियान्ता विशालराज महतले शिवम् सिमेन्टसँग सम्बन्धित वातावरणीय तथा स्थानीय सरोकारका विषयमा आफ्नो तर्फबाट गर्न सकिने सबै पहल गरिएको बताएका छन्।
सामाजिक सञ्जाल फेसबुकमार्फत सार्वजनिक गरेको धारणामा महतले करिब चार महिनाको अवधिमा उद्योग, सम्बन्धित मन्त्रालय, वातावरण शाखा, नगरपालिका तथा अन्य सरोकारवाला निकायको ध्यानाकर्षण गराइएको उल्लेख गरेका छन्। साथै उद्योग, स्थानीय पीडित, सम्बन्धित सरकारी निकाय र सरोकारवालालाई एउटै स्थानमा राखेर अन्तरक्रिया सञ्चालन गरी समस्याको समाधान खोज्ने प्रयास समेत गरिएको उनले बताएका छन्।
उनका अनुसार आफूहरूको जिम्मेवारी सम्बन्धित निकायसम्म विषय पुर्याउने र समाधानका लागि पहल गर्ने थियो। त्यसपछिको निर्णय तथा कार्यान्वयनको जिम्मेवारी भने सम्बन्धित सरकारी निकायको हुने उनले स्पष्ट पारेका छन्।
महतले यस अवधिमा “किन चुप लाग्नुभयो?” वा “कतै सेटिङ त भएन?” भन्ने खालका टिप्पणीहरू पनि आएको उल्लेख गर्दै ती आरोप सत्य नभएको बताएका छन्। सम्बन्धित निकाय सबै विषयमा जानकार हुँदाहुँदै पनि आवश्यक निर्णय र कार्यान्वयन नगरेसम्म केवल आवाज उठाएर मात्र समस्या समाधान नहुने उनको भनाइ छ।
उनले आक्रोशमा आन्दोलन, तोडफोड वा कानुनविपरीतका गतिविधि गर्नु समाधान नभएको पनि बताएका छन्। यस्ता गतिविधिले थप कानुनी समस्या, दुःख तथा बन्दी जीवनसमेत निम्त्याउन सक्ने भएकाले संयमित रूपमा समाधान खोज्ने प्रयासलाई निरन्तरता दिइएको उनले उल्लेख गरेका छन्।
महतले ‘सेटिङ भयो’ भन्ने चर्चा तथ्यमा आधारित नभएको स्पष्ट पार्दै आफ्नो तर्फबाट आवश्यक स्पष्टीकरण दिएको र यस विषयमा सबैलाई आफ्नो धारणा बनाउने स्वतन्त्र अधिकार रहेको बताएका छन्।
