हेटौंडा, माघ १५ गते । हेटौंडा उपमहानगरपालिका वडा नम्बर १० को आयोजनामा तेस्रो घरेलु उत्पादन प्रवर्द्धन प्रदर्शनी तथा नृत्य प्रतियोगिता एवम् शैक्षिक मेला आगामी माघ १६ र १७ गते हेटौंडा बसपार्कमा आयोजना हुने भएको छ।
वडाध्यक्ष फुर्वा दोर्जे लामाका अनुसार मेलाको समुद्घाटन माघ १६ गते बिहान ११:०० बजे बागमती प्रदेश प्रमुख श्री दिपक प्रसाद देवकोटाको प्रमुख आतिथ्यतामा हुने तय भएको छ। घरेलु उत्पादनको प्रवर्द्धन, स्थानीय सीपको पहिचान, सांस्कृतिक नृत्यको संरक्षण तथा शैक्षिक चेतना अभिवृद्धि गर्ने उद्देश्यले मेला आयोजना गर्न लागिएको वडाध्यक्ष लामाले जानकारी दिएका छन्।
उक्त मेलामा स्थानीय घरेलु उत्पादनका स्टलहरू, विविध नृत्य प्रतियोगिता तथा शैक्षिक सामग्री प्रदर्शनी रहने जनाइएको छ। वडाध्यक्ष लामाले हेटौंडा उपमहानगरपालिकाका वडा नम्बर १ देखि १९ सम्मका सम्पूर्ण आमा–बुवा, दाजुभाइ तथा दिदीबहिनीहरूलाई कार्यक्रममा उपस्थित भई मेलालाई सफल बनाउन हार्दिक अनुरोध गरेका छन्।
स्थानीय उत्पादनको बजार प्रवर्द्धनसँगै सांस्कृतिक र शैक्षिक गतिविधिलाई एकै स्थानमा समेट्ने उद्देश्यले आयोजना गरिने यो मेला हेटौंडाका लागि महत्वपूर्ण अवसर हुने अपेक्षा गरिएको छ।
