हेटौँडा, माघ २५ गते । नेकपा एमाले केन्द्रीय सदस्य तथा प्रतिनिधिसभा क्षेत्र नं. १ का उम्मेद्वार रामेश्वर रानाले आफ्नो उम्मेद्वारीले मकवानपुरका जनता उत्साहित र सन्तुष्ट देखिएको बताएका छन्। नेकपा एमालेबाट निर्वाचित वर्तमान तथा पूर्व जनप्रतिनिधिहरूको भेलालाई सम्बोधन गर्दै उनले मुलुकलाई विद्यमान संकटबाट मुक्त गर्दै विकास र समृद्धिको यात्रामा अघि बढाउन एमालेको जित अपरिहार्य रहेको धारणा राखे।
उम्मेद्वार रानाले कार्यकर्ता तथा जनप्रतिनिधिहरूलाई कुनै पनि भ्रम वा अन्योलमा नपरी आत्मविश्वासका साथ निर्वाचन अभियानमा जुट्न आग्रह गरे। उनले संगठनात्मक एकता र जनसम्पर्कलाई बलियो बनाउँदै चुनावी मैदानमा होमिनु आवश्यक रहेको बताए। भेलामा संविधानसभा सदस्य अनन्त पौडेलले फागुन २१ गते हुने निर्वाचन राष्ट्रियता र राष्ट्रिय स्वाभिमानको रक्षा गर्ने अवसरका रूपमा रहेको उल्लेख गर्दै एमालेको विजयका लागि सबै एकजुट हुनुपर्ने बताए। उनले अब बन्ने संसदले देशलाई निकास दिन नसके संविधान, लोकतन्त्र मात्र होइन राष्ट्रियतामै खतरा उत्पन्न हुन सक्ने चेतावनी दिए।
त्यसैगरी नेकपा एमाले केन्द्रीय सदस्य तथा प्रदेशसभा सदस्य एकलाल श्रेष्ठले वैधानिक र निर्णायक रूपमा निर्वाचन जितेर बहुमतसहित सरकार गठन गर्नुपर्ने आवश्यकता औंल्याए। मकवानपुरमा एमालेको विगतको साखलाई कायम राख्दै व्यवस्थित रूपमा चुनावी तयारीमा लाग्न उनले कार्यकर्तालाई निर्देशन दिए।
नेकपा एमाले केन्द्रीय लेखा आयोगका सदस्य तथा हेटौँडा उपमहानगरपालिका दलका नेता नवीन सिग्देलको अध्यक्षतामा सम्पन्न भेलामा पूर्व सांसद कृष्णप्रसाद दाहाल, प्रदेश कमिटी सदस्यहरू फुर्वादोर्जे घिसिङ, गणेशकुमारी श्रेष्ठ, नगर कमिटी अध्यक्ष बोलबहादुर कार्की लगायतको उपस्थिति रहेको थियो। उक्त जानकारी नेकपा एमाले जिल्ला उपसचिव तथा दलका सचिव फुर्वादोर्जे लामाले दिएका हुन्।
