हेटौंडा, फागुन २६ गते । मदन भण्डारी स्वास्थ्य विज्ञान प्रतिष्ठान अन्तर्गत रहेको हेटौंडा अस्पतालमा शववाहन अभाव रहेको विषयमा एम्बुलेन्सलाई शववाहनमा रुपान्तरण गर्ने प्रस्ताव अघि बढे पनि कानुनी प्रावधान स्पष्ट नभएकाले प्रक्रिया अन्योलमा परेको छ।
जनस्वास्थ्य कार्यालय मकवानपुरमा हिजो एम्बुलेन्स सञ्चालन सम्बन्धी विषयमा भएको छलफलका क्रममा हेटौंडा अस्पतालमा शववाहन अभाव रहेको जानकारी प्राप्त भएको हो।
एम्बुलेन्स सेवा निर्देशिका २०८२ अनुसार १० वर्षभन्दा बढी सञ्चालन भएका “ग” वर्गका एम्बुलेन्स सञ्चालन गर्न नमिल्ने व्यवस्था छ। सोही आधारमा हर्नामाडी स्वास्थ्य चौकीको एम्बुलेन्सलाई २०८२ माघ ४ गतेको निर्णयअनुसार शववाहनका रूपमा हस्तान्तरण गर्न सिफारिस गरिएको बताइएको छ।
त्यसैगरी २०८२ माघ १३ गते हेटौंडा उपमहानगरपालिकाले पनि सोही प्रयोजनका लागि सिफारिस गरेको पाइएको छ।
तर एम्बुलेन्स सेवा निर्देशिकामा एम्बुलेन्सलाई शववाहनमा रुपान्तरण गर्ने स्पष्ट प्रावधान नभएकाले प्रक्रिया अघि बढाउन कठिनाइ भएको जनस्वास्थ्य कार्यालयले जनाएको छ।
जनस्वास्थ्य अधिकृत तथा सूचना अधिकारी लक्ष्मण घिमिरे र जनस्वास्थ्य प्रशासक किरण श्रेष्ठले मिल्ने कानुनी व्यवस्था भएमा उक्त प्रस्तावलाई माथिल्लो निकायमा पठाउन आफूहरू तयार रहेको बताएका छन्।
सेवा सहयोग र आवाजका अध्यक्ष तथा सामाजिक अभियन्ता विशालराज महतले सामाजिक सञ्जालमार्फत यो विषय सार्वजनिक गर्दै सम्बन्धित निकायले छिटो निर्णय गरी समस्या समाधान गर्न ध्यान दिनुपर्ने बताएका छन्।
