हेटौंडा, चैत १५ गते । नेकपा (एमाले) का अध्यक्ष केपी शर्मा ओलीको रिहाइको माग गर्दै पार्टीले देशभरका ७७ वटै जिल्ला प्रशासन कार्यालयमा आज एकैसाथ ज्ञापनपत्र बुझाएको छ। पार्टीको केन्द्रीय निर्देशनअनुसार सबै जिल्ला कमिटीहरूले आ–आफ्नो क्षेत्रमा उपस्थित भई प्रशासन समक्ष मागपत्र पेश गरेका हुन्।
एमालेले आफ्नो अध्यक्षको रिहाइको मागलाई प्रमुख एजेन्डा बनाउँदै देशव्यापी दबाब कार्यक्रम सञ्चालन गरेको जनाएको छ। सोही क्रममा विभिन्न जिल्लामा शान्तिपूर्ण रूपमा ज्ञापनपत्र बुझाइएको भए पनि केही स्थानमा प्रदर्शन र नाराबाजी समेत भएको देखिएको छ।
यसैबीच, हेटौडामा ज्ञापनपत्र बुझाउने कार्यक्रमसँगै सडक प्रदर्शन र नाराबाजी समेत गरिएको छ। प्रदर्शनका क्रममा गृहमन्त्री सुदन गुरुङको राजीनामाको माग समेत उठाइएको थियो।
तर, सोही क्रममा केही स्थानमा भने अप्रिय घटना पनि भएको छ। समाचार सङ्कलनका लागि खटिएका पत्रकारहरूमाथि एमालेका केही कार्यकर्ताबाट हातपात भएको घटना सार्वजनिक भएको छ। उक्त घटनापछि पत्रकार सुरक्षाको विषयलाई लिएर स्थानीय स्तरमा चर्को बहस सुरु भएको छ।
पत्रकारमाथि भएको दुर्व्यवहारप्रति सञ्चारकर्मी तथा सरोकारवालाहरूले आपत्ति जनाउँदै दोषीमाथि कारबाहीको माग गरेका छन्। अभिव्यक्ति स्वतन्त्रता र प्रेस स्वतन्त्रताको सम्मान गर्नुपर्ने आवाज समेत उठ्न थालेको छ।
यस घटनाले आन्दोलनका क्रममा अनुशासन, जिम्मेवारी र प्रेस स्वतन्त्रताको सुनिश्चितताबारे पुनः प्रश्न खडा गरेको छ।
