हेटौंडा, चैत १६ गते । स्कुलरोडबाट सुरु भएको प्रभातफेरी र्याली बुद्धचोक हुँदै मकवानपुर उद्योग वाणिज्य संघ परिसर पार गर्दै सिमाचोकमा पुगेर कोणसभामा परिणत भएको थियो। कार्यक्रममा जिल्लास्थित पत्रकार, सञ्चारकर्मी तथा विभिन्न सरोकारवाला व्यक्तिहरूको उल्लेख्य सहभागिता रहेको थियो।
प्रभातफेरीमार्फत पत्रकारहरूले पेशागत एकता, प्रेस स्वतन्त्रता र जिम्मेवार पत्रकारिताको सन्देश प्रवाह गरेका थिए।
महासंघकी अध्यक्ष निर्मला शर्माले स्थापना दिवसको अवसरमा जारी गरेको शुभकामना सन्देशमा महासंघले सात दशकभन्दा लामो इतिहास बोकेको उल्लेख गर्दै प्रेस स्वतन्त्रता र श्रमजीवी पत्रकारहरूको हितमा निरन्तर काम गर्दै आएको बताएकी छिन्। उनले सामाजिक सञ्जालको बढ्दो प्रयोगसँगै मिथ्या सूचना फैलिने क्रम बढेकाले तथ्यपरक र विश्वसनीय सूचना प्रवाह गर्नु अहिलेको मुख्य चुनौती बनेको उल्लेख गरिन्।
कार्यक्रममा बागमती प्रदेश अध्यक्ष कृष्णसारु मगरले पत्रकारिताको मूल मर्म सम्झाउँदै जनतालाई सही र सत्य सूचना उपलब्ध गराउनु पत्रकारहरूको प्रमुख दायित्व भएको बताए।
त्यसैगरी महासंघ मकवानपुरका अध्यक्ष बालकृष्ण अधिकारीले मानव अधिकारको संरक्षण, नागरिकको सूचना पहुँच सुनिश्चित गर्ने तथा सार्वजनिक सरोकारका विषयमा पत्रकारहरूको भूमिका अझै सशक्त हुनुपर्ने धारणा व्यक्त गरे।
कार्यक्रममा संस्थापक अध्यक्ष प्रताप विष्ट, उपाध्यक्ष हरि हुमागाईं तथा पूर्व अध्यक्ष राममणि दाहाललगायतको आतिथ्यता रहेको थियो।
महासंघले हालैका आन्दोलनका क्रममा निशानामा परेका सञ्चारगृह तथा दुर्घटनामा परेका पत्रकारहरूको क्षतिपूर्ति सुनिश्चित गर्न सरकारसँग माग गरेको छ। साथै सञ्चार क्षेत्रसँग सम्बन्धित रोकिएका कानुनहरू पारित गरी आवश्यक नयाँ कानुन ल्याउन पनि महासंघले सक्रिय पहल गरिरहेको जनाएको छ।
७१औँ वर्षमा प्रवेशसँगै महासंघले जिम्मेवार, निष्पक्ष र तथ्यपरक पत्रकारिताप्रति आफ्नो प्रतिबद्धता पुनः दोहोर्याएको छ।
