काठमाडौं,बैशाख ८ गते । नेपालको सूचना प्रविधि तथा साइबर सुरक्षाको क्षेत्रमा लामो अनुभव संगालेका विज्ञ चिरञ्जीवी अधिकारी टेक पाइला इनोभेसनमा एसोसिएट डाइरेक्टर पदमा नियुक्त भएका छन्। डिजे समूह अन्तर्गत सञ्चालित उक्त संस्थाले अधिकारीलाई महत्वपूर्ण जिम्मेवारी प्रदान गर्दै संस्थागत विकास र डिजिटल रूपान्तरणलाई थप तीव्र बनाउने अपेक्षा गरेको जनाएको छ।
करिब साढे दुई दशकदेखि सूचना तथा सञ्चार प्रविधि क्षेत्रमा सक्रिय अधिकारी हाल क्यान महासंघका वरिष्ठ उपाध्यक्ष तथा सूचना प्रविधि नीति संयोजकको भूमिकामा समेत कार्यरत छन्। उनले यसअघि नेपाल सरकारका विभिन्न निकायसँग सहकार्य गर्दै साइबर सुरक्षा र प्रविधि विकासका क्षेत्रमा उल्लेखनीय योगदान पुर्याएका छन्।
टेक पाइला इनोभेसनमा उनको नेतृत्वमा कृत्रिम बुद्धिमत्ता (AI) र साइबर सुरक्षालाई प्राथमिकतामा राख्दै नयाँ सोच, नयाँ गति र नयाँ सम्भावनाको ढोका खोलिने विश्वास गरिएको छ। अधिकारीले नेपाललाई भारत र चीनजस्ता छिमेकी मुलुकहरूसँग डिजिटल सहकार्यमार्फत “डिजिटल पुल” का रूपमा विकास गर्ने दीर्घकालीन लक्ष्य पनि अघि सारेका छन्।
उनका अनुसार अबको आवश्यकता प्रमाणपत्रमा सीमित शिक्षा नभई सीपमा आधारित दक्ष जनशक्ति उत्पादन गर्नु हो। “सीप पहिलो” अवधारणा मार्फत नेपाली युवालाई विश्वस्तरमा प्रतिस्पर्धी बनाउने उनको योजना रहेको छ।
टेक पाइला इनोभेसनका अध्यक्ष तथा नेपाल चेम्बर अफ कमर्सका निवर्तमान अध्यक्ष राजेन्द्र मल्लले अधिकारीको आगमनले संस्थालाई नयाँ उचाइमा पुर्याउने विश्वास व्यक्त गरेका छन्। उनले प्रविधि क्षेत्रमा अनुभवी नेतृत्व भित्र्याउनु संस्थाका लागि गौरवको विषय भएको बताए।
त्यसैगरी डिजे समूहका अध्यक्ष विज्ञान श्रेष्ठले पनि सूचना प्रविधि क्षेत्रका अनुभवी व्यक्तित्वलाई संस्थामा जोड्न पाउनु सकारात्मक संकेत भएको उल्लेख गर्दै यसले संस्थाको गति र पहिचान दुवैलाई थप मजबुत बनाउने विश्वास व्यक्त गरेका छन्।
