काठमाडौं,बैशाख १० गते । नेपाल प्रहरी प्रधान कार्यालय केन्द्रीय अनुसन्धान ब्युरो (सीआईबी) ले धितोपत्र सम्बन्धी ऐन, २०६३ अन्तर्गतको कसुरमा हिमालयन रिइन्स्योरेन्स लिमिटेडका तत्कालीन अध्यक्ष शेखर गोल्छालाई पक्राउ गरेको छ।
सीआईबीद्वारा जारी प्रेस विज्ञप्ति अनुसार नेपाल धितोपत्र बोर्डको प्रारम्भिक जाँचबुझ प्रतिवेदनका आधारमा गोल्छामाथि अनुसन्धान अघि बढाइएको हो। काठमाडौँ जिल्ला नागार्जुन नगरपालिका–८ का बासिन्दा हुलासचन्द्र गोल्छाका छोरा, वर्ष ५९ का शेखर गोल्छा उक्त प्रकरणमा संलग्न रहेको आरोपमा पक्राउ परेका हुन्।
विज्ञप्तिअनुसार धितोपत्र सम्बन्धी ऐनको दफा ९४, ९५ र ९६ को उपदफा (१) तथा दफा १८ बमोजिमको कसुरमा संलग्न रहेको आशंकामा उनलाई अनुसन्धानको दायरामा ल्याइएको हो। सोही ऐनको दफा १०३ को उपदफा (३) अनुसार थप अनुसन्धान तथा कानुनी कारबाहीका लागि प्रक्रिया अघि बढाइएको प्रहरीले जनाएको छ।
सीआईबीले २०८३ साल वैशाख १० गते काठमाडौँ जिल्ला अदालत, बबरमहलबाट पक्राउ अनुमति लिएपछि सोही दिन काठमाडौँको नक्सालबाट गोल्छालाई पक्राउ गरेको हो। हाल उनीमाथि थप अनुसन्धान भइरहेको प्रहरीले जानकारी दिएको छ।
यस प्रकरणमा अन्य व्यक्तिहरूको संलग्नता भए/नभएको विषयमा समेत अनुसन्धान जारी रहेको सीआईबीले जनाएको छ।
