काठमाडौं,बैशाख १० गते । राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनका लागि उम्मेदवार छनोट प्रक्रिया औपचारिक रूपमा सुरु गरेको छ।
पार्टीको केन्द्रीय कार्यालयले जारी गरेको सूचनाअनुसार वैशाख ७ गते बसेको केन्द्रीय समिति बैठकको निर्णयअनुसार उम्मेदवार छनोटलाई व्यवस्थित र पारदर्शी बनाउन विशेष समिति गठन गरिएको हो।
समितिमा पार्टीका सह-महामन्त्री तथा संयोजक विपिनकुमार आचार्यसहित विभिन्न केन्द्रीय सदस्यहरूलाई जिम्मेवारी दिइएको छ। समितिमा सचिव, सदस्य लगायतका पदाधिकारीहरू समेटिएका छन्।
उम्मेदवार छनोटका लागि वडा, पालिका, जिल्ला र प्रदेश तहबाट सिफारिस संकलन गर्ने कार्यतालिका समेत सार्वजनिक गरिएको छ। प्राप्त सिफारिसहरूको अध्ययन गरी अन्तिम उम्मेदवार टुंगो लगाइने जनाइएको छ।
पार्टीले सबै तहका समितिहरूलाई निर्धारित समयसीमाभित्र सुझाव तथा सिफारिस पठाउन निर्देशन दिएको छ। साथै, आवश्यक परे थप जानकारीका लागि सम्बन्धित पदाधिकारीसँग सम्पर्क गर्न सकिने पनि सूचनामा उल्लेख गरिएको छ।
