झुझुरे,बैशाख ३१ गते । बागमती गाउँपालिकाले बागमती फुटबल एकेडेमी सञ्चालनका लागि आवेदन दिएका खेलाडीहरूको छनोट कार्यक्रम आज (बिहीबार) सञ्चालन गर्ने भएको छ।
गाउँपालिकाले जारी गरेको अत्यन्त जरुरी सूचनाअनुसार बागमती गाउँपालिकाको खेलकुद एकेडेमी सञ्चालन तथा व्यवस्थापन सम्बन्धी कार्यविधि २०८१ (संशोधन २०८२ सहित) को दफा ९ तथा दफा १९ बमोजिम फुटबल एकेडेमी स्थापना तथा सञ्चालन प्रक्रिया अघि बढाइएको हो।
यसअघि प्रकाशित विद्यार्थी तथा फुटबल प्रशिक्षार्थी भर्ना सम्बन्धी सूचनाअनुसार आवेदन दिएका १३ जना खेलाडीहरूको छनोट कार्यक्रम जनता माविको खेलमैदान, बागमती–८ मकवानपुरमा बिहान ठीक ८ बजेदेखि सञ्चालन हुने जनाइएको छ।
छनोट प्रक्रियामा हेटौंडा, बकैया तथा बागमती क्षेत्रका खेलाडीहरू सहभागी हुनेछन्। गाउँपालिकाले सम्बन्धित सम्पूर्ण खेलाडी तथा अभिभावकलाई अनिवार्य उपस्थितिका लागि अनुरोध गरेको छ।
सूचनाअनुसार छनोटमा सहभागी हुने खेलाडीहरूले फुटबल बुट, जुराफ, सिनप्याड तथा एक सेट जर्सी अनिवार्य रूपमा लगाएर उपस्थित हुनुपर्नेछ। साथै छनोट कार्यक्रमलाई व्यवस्थित बनाउन बागमती फुटबल एकेडेमी व्यवस्थापन समितिलाई आवश्यक समन्वय र सहकार्य गर्न आग्रह गरिएको छ।
खेलाडी छनोट कार्यक्रममार्फत उत्कृष्ट प्रतिभालाई एकेडेमीमा आबद्ध गरी व्यावसायिक फुटबल प्रशिक्षण प्रदान गर्ने गाउँपालिकाको लक्ष्य रहेको बताइएको छ।
