हेटौँडा,जेठ ५ गते। हेटौंडा उपमहानगरपालिका वडा नं. १३ वडा कार्यालयले आर्थिक वर्ष २०८२/८३ को वार्षिक स्वीकृत कार्यक्रम अन्तर्गत कृषकहरूलाई ७० प्रतिशत अनुदानमा केराको बिरुवा वितरण गर्ने भएको छ। वडा कार्यालयले दोस्रो पटक सूचना प्रकाशित गर्दै केरा खेती प्रवर्धनका लागि इच्छुक कृषकहरूलाई सात दिनभित्र आवेदन दिन आग्रह गरेको हो।
वडा कार्यालयका अनुसार कार्यक्रम अन्तर्गत कृषकहरूले ३० प्रतिशत लागत सहभागिता गर्नुपर्नेछ भने बाँकी ७० प्रतिशत रकम वडा कार्यालयबाट अनुदान स्वरूप उपलब्ध गराइनेछ। कार्यक्रम मार्फत वडा क्षेत्रभित्र व्यावसायिक केरा खेती विस्तार गरी कृषकहरूको आयआर्जन वृद्धि गर्ने लक्ष्य राखिएको जनाइएको छ।
बिरुवा आवश्यक पर्ने कृषकहरूले प्रत्येक टोल विकास संस्थाको प्रतिनिधित्व हुने गरी वडा कार्यालयमा निवेदन पेश गर्नुपर्नेछ। आवेदनका लागि निवेदन फारम, नागरिकताको फोटोकपी, बसाइँसराइ गरी आएका व्यक्तिको हकमा बसाइँसराइ प्रमाणपत्रको फोटोकपी तथा अन्य पालिकाबाट विवाह गरी आएका महिलाको हकमा विवाह दर्ता प्रमाणपत्रको फोटोकपी पेश गर्नुपर्ने सूचनामा उल्लेख गरिएको छ।
वडाध्यक्ष पेम्बा लामाले समयभित्र आवश्यक कागजातसहित आवेदन दिन सम्पूर्ण कृषकहरूलाई अनुरोध गरेका छन्।
