काठमाडौं,जेठ ७ गते। नेपालमा युवापुस्तामाझ बढ्दो राजनीतिक निराशा, भ्रष्टाचारप्रतिको आक्रोश र सामाजिक सञ्जालमा फैलिएको meme culture बीच “खरानी पार्टी नेपाल” नामक व्यङ्ग्यात्मक राजनीतिक अभियान सार्वजनिक भएको छ।
“खरानीबाट, जनताका लागि” भन्ने नारासहित अघि सारिएको उक्त अभियानले छोटो समयमै सामाजिक सञ्जालमा व्यापक चर्चा बटुलेको छ। अभियानले आफूलाई परम्परागत राजनीतिक दलभन्दा फरक “व्यवस्थामाथिको व्यङ्ग्यात्मक प्रतिरोध र चेतावनी” का रूपमा प्रस्तुत गरेको जनाएको छ।
खरानी पार्टीले सार्वजनिक गरेको अवधारणापत्रमा भ्रष्टाचार, राजनीतिक वंशवाद, झुटा चुनावी आश्वासन, प्रचारमुखी राजनीति तथा युवाको बेरोजगारी जस्ता विषयलाई मुख्य मुद्दा बनाइएको छ।
पार्टीको घोषणापत्रमा समेटिएका केही प्रस्तावले विशेष चर्चा पाएका छन्। “७ मिनेटभन्दा लामो भाषण गर्ने नेताको mic स्वतः mute हुने”, “संसदमा हानाहान भए livestream टिकट बिक्री गरिने” तथा “भ्रष्टाचार trend भए स्वतः अनुसन्धान सुरु हुने” जस्ता प्रस्तावहरूलाई सामाजिक सञ्जाल प्रयोगकर्ताले व्यङ्ग्यात्मक राजनीतिक सन्देशका रूपमा लिएका छन्।
हाल TikTok, Facebook र Instagram लगायत प्लेटफर्ममा पार्टीका meme शैलीका पोस्टर, लोगो तथा प्रचार सामग्री तीव्र रूपमा फैलिरहेका छन्। विशेषगरी Gen Z पुस्ताले यसलाई “political satire movement” भन्दै समर्थन र चासो व्यक्त गरिरहेका छन्।
