हेटौंडा,जेठ १४ गते। हेटौंडा उपमहानगरपालिका–४ भुटनदेवी मोडस्थित शेर बहादुर पहरीले सञ्चालन गरेको रोयल पार्टी प्यालेसमा आज आगलागी हुँदा करिब २० लाख रुपैयाँ बराबरको क्षति भएको छ ।
प्रहरीका अनुसार आज दिउँसो अन्दाजी १२ः२५ बजे सभा हलको स्टेजमा विद्युत् सर्ट भई आगलागी भएको हो । आगलागी भएको खबर प्राप्त हुना साथ वडा प्रहरी कार्यालय सानो पोखराबाट २ जना तथा जिल्ला प्रहरी कार्यालय मकवानपुरबाट प्रहरी सहायक निरीक्षकको कमाण्डमा ५ जना प्रहरी टोली घटनास्थलमा खटिएको थियो ।
स्थानीयवासी तथा हेटौंडा उपमहानगरपालिकाको दमकलको सहयोगमा आगो करिब २० मिनेटपछि अर्थात् १२ः४५ बजे पूर्ण रूपमा नियन्त्रणमा आएको प्रहरीले जनाएको छ ।
आगलागीबाट सभा हलको स्टेजमा रहेको जिप्सन, एक थान लाइट, इलेक्ट्रोनिक तार, जस्ता तथा स्टेन बोर्ड लगायतका सामग्री जलेर नष्ट भएको छ । घटनाबाट अन्दाजी २० लाख रुपैयाँ बराबरको क्षति भएको प्रारम्भिक अनुमान गरिएको छ ।
घटनामा कुनै मानवीय तथा चौपाया क्षति नभएको प्रहरीले जनाएको छ ।
