हेटौंडा,जेठ १४ गते। बागमती प्रदेश खेलकुद विकास परिषद्को आयोजनामा जारी १६औं संस्करणको प्रदेशस्तरीय राष्ट्रपति रनिङ्ग शिल्ड अन्तर्गत उसु प्रतियोगिता सम्पन्न भएको छ । बिहीबार राष्ट्रिय खेलकुद परिषद् (राखेप) को कभर्ड हलमा सम्पन्न प्रतियोगितामा मकवानपुरकी खेलाडी युना पुलामी मगरले काँश्य पदक जित्दै जिल्लालाई पदक दिलाएकी छन् ।
सान्शोउ विधाअन्तर्गत ४८ केजी तौल समूहमा प्रतिस्पर्धा गरेकी बागमती गाउँपालिका–६ निवासी युना पुलामी मगर तृतीय हुँदै काँश्य पदक जित्न सफल भएकी हुन् । टिम प्रशिक्षक जयराम रथाल मगरका अनुसार मकवानपुर टोलीबाट सहभागी खेलाडीमध्ये युनाले मात्रै पदक दिलाएकी हुन् ।
प्रतियोगितामा मकवानपुरबाट १२ जना खेलाडी सहभागी भए पनि अन्य खेलाडी पदकविहीन बनेका प्रशिक्षक मगरले जानकारी दिए । यस वर्ष उसु प्रतियोगितामा बागमती गाउँपालिकाका खेलाडीहरूको उल्लेख सहभागिता रहेको तथा हेटौंडाका खेलाडीहरू पनि सहभागी भएको उनले बताए ।
नयाँ खेलाडीहरूको सहभागिता धेरै रहेकाले अपेक्षाअनुसार सफलता हासिल गर्न नसकिएको प्रशिक्षक मगरको भनाइ छ । प्रतियोगितामा विश्वनाथ निर्णायकको भूमिकामा रहेका थिए भने आयुष लामा, लिज्जा प्रजा र रितिका खतिवडा टिम म्यानेजरका रूपमा सहभागी भएका थिए ।
प्रदेशस्तरीय राष्ट्रपति रनिङ्ग शिल्ड अन्तर्गत विभिन्न खेलका प्रतिस्पर्धा जारी रहेका छन् ।
