सुर्खेत,जेठ १५ गते। दर्शन खबर डट कमका सम्पादक चिन्तामणि कँडेलमाथि भएको कुटपिट घटनाप्रति नेपाल पत्रकार महासंघले गम्भीर ध्यानाकर्षण भएको जनाएको छ । महासंघले पत्रकारमाथिको आक्रमणलाई स्वतन्त्र पत्रकारिताविरुद्धको निन्दनीय कार्य भएको उल्लेख गर्दै दोषी माथि कानुनी कारबाहीको माग गरेको छ ।
नेपाल पत्रकार महासंघ कर्णाली प्रदेश समितिका अनुसार गत जेठ १२ गते सुर्खेतमा निर्माणाधीन सडक नगरपालिकाको मापदण्ड विपरीत रहेको विषयमा प्रश्न उठाएको भन्दै निर्माण व्यवसायी सुरज थापाले सम्पादक कँडेलमाथि कुटपिट गरेका थिए । उक्त आक्रमणबाट कँडेलको देब्रे कानको जाली फुटेको जनाइएको छ ।
महासंघले घाइते पत्रकार कँडेलको शीघ्र स्वास्थ्य लाभको कामना गर्दै पेसागत जिम्मेवारी निर्वाह गर्ने क्रममा पत्रकारमाथि भएको आक्रमण लोकतान्त्रिक मूल्य र प्रेस स्वतन्त्रता माथिको प्रहार भएको जनाएको छ ।
महासंघले घटनाको निष्पक्ष छानबिन गर्न, दोषीलाई कानुनअनुसार कारबाही गर्न तथा पत्रकारले सुरक्षित र निर्भय वातावरणमा काम गर्न पाउने अवस्था सुनिश्चित गर्न सम्बन्धित निकायसँग माग गरेको छ ।
