हेटौंडा,असार ३ गते। श्रमको सम्मान, राष्ट्रको अभियान कार्यक्रम अन्तर्गत हेटौंडा उपमहानगरपालिका अनौपचारिक क्षेत्रमा कार्यरत श्रमिकलाई सामाजिक सुरक्षा कोषमा आबद्ध गराउने पहिलो उपमहानगरपालिका बनेको छ ।
उपमहानगरपालिकाले आफ्नो क्षेत्रभित्र विभिन्न क्षेत्रमा कार्यरत ६० जना अनौपचारिक श्रमिकलाई सामाजिक सुरक्षा कोषमा आबद्ध गराउँदै परिचयपत्र वितरण गरेको हो । कार्यक्रममा घरेलु कामदार, कृषि क्षेत्र तथा निर्माण क्षेत्रमा कार्यरत श्रमिकहरू समावेश रहेका छन् ।
सामाजिक सुरक्षा कोषमा आबद्ध हुन उपमहानगरपालिकाले प्रतिश्रमिक मासिक १ हजार १४० रुपैयाँ योगदान गर्नेछ भने योगदानकर्ताले मासिक १ हजार ३४० रुपैयाँ जम्मा गर्नुपर्ने व्यवस्था गरिएको छ ।
कोषमा आबद्ध भएका श्रमिकलाई परिचयपत्र वितरण गर्दै हेटौंडा उपमहानगरपालिकाकी नगर प्रमुख मीनाकुमारी लामाले श्रमिकको सामाजिक सुरक्षालाई प्राथमिकतामा राख्दै आगामी दिनमा थप श्रमिकलाई समेत कार्यक्रममा समेट्दै जाने बताइन् ।
उनले श्रमिकको हकहित र सामाजिक सुरक्षाको सुनिश्चितताका लागि उपमहानगरपालिका निरन्तर सक्रिय रहने उल्लेख गरिन् ।
