हेटौंडा, असार ५ गते। जिल्ला प्रहरी कार्यालय मकवानपुरले लागू औषधसहित एक जनालाई पक्राउ गरेको जनाएको छ।
प्रहरीका अनुसार हिजो अपरान्न करिब ६ बजे प्रहरी चौकी भैंसेबाट खटिएको चेकिङ टोलीले भीमफेदी गाउँपालिका–२ भैंसेस्थित सडक खण्डमा सवारी साधन जाँच गर्ने क्रममा हेटौंडाबाट भैंसेतर्फ जाँदै गरेको बा.प.०२–०६०प ४२२२ नम्बरको स्कुटर रोकेको थियो।
चेकजाँचका क्रममा स्कुटर चालक कालिकाटार बस्ने सुजल थापामाथि शङ्का लागेपछि प्रहरीले खानतलासी गर्दा उनले लुकाईछिपाई ल्याएको अवस्थामा दुई ग्राम ६२० मिलिग्राम खैरो हिरोइन जस्तो देखिने पदार्थ तथा लागू औषध नाइट्राजेपाम (NITRAZEPAM) आठ ट्याब्लेट फेला परेको प्रहरीले जनाएको छ।
बरामद गरिएको लागू औषधसहित थापालाई नियन्त्रणमा लिई मकवानपुर जिल्ला अदालतबाट लागू औषध कसुर मुद्दामा म्याद अनुमति लिएर थप अनुसन्धान भइरहेको सूचना अधिकारी प्रहरी नायब उपरीक्षक माधवप्रसाद काफ्लेले जानकारी दिएका छन्।
