हेटौडा, असार १५ गते। हेटौंडा उपमहानगरपालिकाका मेयर मीना कुमारी लामाले राष्ट्रिय धान दिवस तथा दही–चिउरा खाने दिनको अवसरमा कृषिप्रति सम्मान र कृषि आत्मनिर्भरताको आवश्यकता औंल्याएकी छन्।
मेयर लामाले सामाजिक सञ्जाल फेसबुकमार्फत शुभकामना सन्देश जारी गर्दै नेपालमा धानको बिउ आयात बढ्दो क्रममा रहेको विषयप्रति चिन्ता व्यक्त गरेकी हुन्।
उनले चालु आर्थिक वर्षको ११ महिनामा १ अर्ब २९ करोड ९४ लाख रुपैयाँ बराबरको २ हजार ९ सय ९३ टन धानको बिउ आयात भएको उल्लेख गर्दै स्वदेशी हाइब्रिड जातको धानको पर्याप्त विकास र उत्पादन नहुँदा किसान विदेशी बिउमा निर्भर हुनुपरेको बताएकी छन्।
सरकारले धानको बिउमा आत्मनिर्भरताको नारा अघि सारे पनि हाइब्रिड बिउको अभाव र कमजोर औपचारिक बिउ उत्पादन प्रणालीका कारण आयात बढिरहेको उनको भनाइ छ।
नेपाललाई कृषि प्रधान देश भनिए पनि कृषिप्रति गर्व गर्ने वातावरण निर्माण गर्न अझै आवश्यक रहेको उल्लेख गर्दै उनले सरकार र आमजनता मिलेर कृषकलाई सम्मान गर्ने वातावरण बनाउनुपर्ने बताएकी छन्।
“कृषकको पसिनाको भरमा हाम्रो जीवन चलेको छ। त्यसैले कृषकको सम्मान र कृषि क्षेत्रको प्रवर्द्धन आजको आवश्यकता हो,” उनले फेसबुक सन्देशमा उल्लेख गरेकी छन्।
राष्ट्रिय धान दिवसका अवसरमा उनले स्वदेशी उत्पादनको संरक्षण, कृषि आधुनिकीकरण र किसानमैत्री नीतिमा जोड दिनुपर्ने आवश्यकता औंल्याएकी छन्।
