हेटौँडा, असार १९ गते । नेपालको गौरव तथा हेटौँडाको पहिचानका रूपमा स्थापित हेटौँडा–११ स्थित शहिद स्मारकभित्र नवनिर्मित जनजाति संग्रहालयमा मगर समुदायको सांस्कृतिक पहिचान झल्किने प्रतिरुप (डम्मी) हस्तान्तरण गरिएको छ।
नेपाल मगर संघ जिल्ला समन्वय समिति मकवानपुर र नेपाल मगर सांस्कृतिक संघ जिल्ला समिति मकवानपुरको संयुक्त पहलमा आयोजित विशेष कार्यक्रममा “मगर समुदायको गौरव र पहिचानको प्रतिरुप” लाई पूर्ण पारम्परिक पोशाकसहित सजाएर संग्रहालय व्यवस्थापन समितिलाई हस्तान्तरण गरिएको हो।
कार्यक्रमको उद्घाटन बागमती प्रदेशका पूर्व मुख्यमन्त्री तथा शहिद स्मारकका संस्थापक अध्यक्ष डोरमणि पौडेलले गरेका थिए। उद्घाटन समारोहलाई सम्बोधन गर्दै उनले नेपालको बहुजातीय, बहुसांस्कृतिक पहिचानलाई संरक्षण र प्रवर्द्धन गर्न संग्रहालयको महत्वपूर्ण भूमिका रहने बताए। उनले जनजातीय संस्कृति, भाषा, भेषभूषा र परम्परालाई नयाँ पुस्तासम्म पुर्याउन यस्ता प्रयास आवश्यक रहेको धारणा व्यक्त गरे।
कार्यक्रममा मगर समुदायका अगुवा, सांस्कृतिककर्मी, सामाजिक व्यक्तित्व तथा स्थानीयवासीहरूको उल्लेखनीय सहभागिता रहेको थियो। सहभागीहरूले मगर समुदायको मौलिक कला, संस्कृति र परम्परालाई संग्रहालयमार्फत राष्ट्रिय तथा अन्तर्राष्ट्रिय स्तरमा चिनाउन सहयोग पुग्ने विश्वास व्यक्त गरेका थिए।
जनजाति संग्रहालयमा विभिन्न जातजातिको मौलिक पहिचान समेट्ने उद्देश्यअनुसार मगर समुदायको प्रतिरुप स्थापना गरिएको आयोजकले जनाएको छ। यसले संग्रहालयलाई थप आकर्षक बनाउनुका साथै सांस्कृतिक पर्यटन प्रवर्द्धनमा समेत टेवा पुग्ने अपेक्षा गरिएको छ।
