उर्लाबारी। कुनैबेला साथीभाइको संगतमा लागेर दुव्यर्सनमा फसेका उर्लाबारी-७ का प्रेम चन्द्र राई अहिले भने कुलतमा फसेका हजारौ युवाहरुको जीवन पुनःस्थापन अभियानमा सक्रिय रहेका छन्।
मोरङको उर्लाबारी वडा नं ७ स्थायी बसोबास गर्दै आएका उनी केही वर्षअघि साथीभाइको संगतले दुर्व्यसनमा फसेका थिए। प्रारम्भिक अवस्थामै सामान्य उपचारपछि जीवनको मूल्य बुझेर नशामुक्त भएका उनले कुलतमा फसेका युवाहरूलाई उद्धार गर्ने दृढ संकल्प गरे ।
सोही उद्देश्य अनुरुप २०७४ सालमा झापाको कन्काई नगरपालिका–३, सुरुङ्गामा ‘नवजीवन प्रतिष्ठान’ नामक पुनर्स्थापना केन्द्र स्थापना गरे। झापालाई केन्द्रविन्दु बनाएर संचालन गरिएको उनको यो प्रतिष्ठानले एचआईभी एड्स, हेपाटाइटिसजस्ता जघन्य रोगसम्बन्धी जनचेतनामूलक कार्यक्रम, पारिवारिक परामर्श, तथा मानसिक सशक्तिकरणको माध्यमबाट पीडितलाई पुनः सम्मानपूर्वक जीवन यापन गर्न सक्षम बनाउने वातावरण निर्माण गरिरहेको छ।
केन्द्रले हालसम्म १ हजार भन्दा बढी दुर्व्यसनमा फसेका व्यक्तिहरूलाई पुनर्जीवन दिन सफल भएको छ । उनको प्रतिष्ठानमा ५ जना कर्मचारीले रोजगारी पाएका छन् भने ३० जना युवाहरू परामर्श सहित उपचाररत रहेका छन्। लागू औषध दुर्व्यसन नियन्त्रण तथ नशा मुक्त समाज निर्माणमा महत्वपूर्ण योगदान पुर्याउदै आएका राईको यो प्रयासले दुव्यर्सनमा फसेर आशा गुमाएका हजारौ युवाहरुमा सकारात्मक संदेश प्रवाह हुने आशा गरिएको छ ।
