हेटौडा, अशोज २० गते । नेपाल विद्युत् प्राधिकरण हेटौडा वितरण केन्द्रले असोज २१ गते (मंगलबार) हेटौडाका विभिन्न क्षेत्रमा लाइन मर्मत तथा सुधार कार्यका कारण विद्युत् आपूर्ति अवरुद्ध हुने जनाएको छ।
प्राधिकरणका अनुसार के.भी. प्रशारण लाइन अन्तर्गत मुनि र दायाँबायाँ तर्फका लाइन नजिक रहेका रूख र बाँसका हाँगाहरू हटाउने, ट्रान्सफर र तार मर्मत कार्य हुने भएकाले अस्थायी रूपमा विद्युत् अवरुद्ध गरिने भएको हो।
कहिलेदेखि कहिलेसम्म अवरुद्ध हुने?
हेटौडाको चौघडा फिडर अन्तर्गत पर्ने हेटौडा बजार, स्कुल रोड, मेन रोड, हुप्रा चौर, चौकीटोल, देविपथ, पुरानो मकवानपुर रोड लगायतका क्षेत्रहरूमा बिहान ८:०० बजेदेखि दिउँसो १२:०० बजेसम्म विद्युत् बन्द हुने प्राधिकरणले जनाएको छ।
त्यसैगरी पदमपोखरी फिडर अन्तर्गत कामाने, रातोमाटे, पशुपतिनगर, सिमेन्ट रोड, ड्राईभर डाँडा, भोर्ले लगायत क्षेत्रमा दिउँसो १:०० बजेदेखि साँझ ५:०० बजेसम्म विद्युत् अवरुद्ध हुनेछ।
त्यस्तै बंशगोपाल फिडर अन्तर्गत पर्ने सामरी हुँदै सानुटार, किसेडी, आमभन्ज्याङ कालीखोला लगायतका आसपासका क्षेत्रमा पनि दिउँसो १:०० बजेदेखि साँझ ५:०० बजेसम्म लाइन बन्द हुनेछ।
विद्युत् प्राधिकरणले उपभोक्ताहरूलाई असुविधा नहोस् भन्ने उद्देश्यले वैकल्पिक व्यवस्था मिलाउने प्रयास भइरहेको जनाउँदै मर्मत कार्य पूरा भएलगत्तै विद्युत् आपूर्ति सुचारु गरिने जनाएको छ।
