हेटौंडा, असार २४ गते । मकवानपुर प्रहरीले छुट्टाछुट्टै स्थानबाट प्रतिबन्धित लागूऔषधसहित दुई जनालाई पक्राउ गरेको छ।
जिल्ला प्रहरी कार्यालय मकवानपुर मातहतबाट खटिएको प्रहरी टोलीले सोमबार (असार २३ गते) साँझ नियमित चेकजाँचका क्रममा हेटौंडा उपमहानगरपालिका–१५ स्थित रातोमाटे चेकपोइन्टबाट बारा जिल्लाको निजगढ नगरपालिका–२ निवासी २५ वर्षीय आर.एन. घिमिरेलाई पक्राउ गरेको हो। उनको साथबाट प्रतिबन्धित लागूऔषध ट्रामाडोल (Tramadol) ५४० क्याप्सुल र नाइट्राजेपाम (Nitrazepam) ४८ ट्याब्लेट बरामद भएको प्रहरीले जनाएको छ।
त्यसैगरी, हेटौंडा उपमहानगरपालिका–१० स्थित बसपार्क क्षेत्रमा गरिएको चेकजाँचका क्रममा काभ्रेपलाञ्चोकको भुम्लु गाउँपालिका–१० निवासी ३७ वर्षीय देव श्रेष्ठलाई पक्राउ गरिएको छ। उनको साथबाट खैरो हेरोइन जस्तो देखिने पदार्थ २ ग्राम २४० मिलिग्राम बरामद भएको प्रहरीले जनाएको छ।
बरामद लागूऔषधसहित दुवै जनालाई नियन्त्रणमा लिई लागूऔषध सम्बन्धी कसुरमा थप अनुसन्धान भइरहेको जिल्ला प्रहरी कार्यालय मकवानपुरले जनाएको छ।
