रौतहट, कात्तिक २३ गते । नेपाली कांग्रेसका नेता तथा पूर्वमन्त्री मोहम्मद आफताव आलमको निधनप्रति सम्मानस्वरूप रौतहट जिल्लाका चार नगरपालिकामा आइतबार एकदिने शोक बिदा दिइएको छ।
शनिबार बिहान २ः५८ बजे काठमाडौँको केएमसी अस्पताल, सिनामङ्गलमा उपचारका क्रममा पूर्वमन्त्री आलमको निधन भएपछि राजपुर, परोहा, इशनाथ र बौधीमाइ नगरपालिकाले आफ्ना मातहतका कार्यालय तथा शिक्षण संस्थाहरू आइतबार बन्द राख्ने निर्णय गरेका हुन्।
राजपुर नगरपालिकाका प्रमुख प्रशासकीय अधिकृत बैजु ठाकुरद्वारा जारी सूचनाअनुसार नगर प्रमुख मोहम्मद डा. राजिक आलमका पिता एवम् पूर्वमन्त्री आलमको निधनमा नगरपालिकाभर शोक बिदा दिइएको छ।
त्यस्तै, परोहा नगरपालिकाका प्रमुख प्रशासकीय अधिकृत मोहम्मद महफुज अहमदले जारी सूचना मार्फत् रौतहट क्षेत्र नं. २ का पूर्व सांसद एवम् पूर्वमन्त्री आलमको निधनमा गहिरो शोक व्यक्त गर्दै आइतबार आकस्मिकबाहेकका सम्पूर्ण सेवा बन्द रहने जानकारी गराएका छन्।
इशनाथ नगरपालिकाले पनि प्रमुख प्रशासकीय अधिकृत सातौँ इसराजुल खाँको हस्ताक्षरमा जारी विज्ञप्तिमार्फत् नगरपालिकाका कार्यालय तथा मातहतका निकायहरूमा एकदिने बिदा घोषणा गरेको छ।
त्यसैगरी, बौधीमाइ नगरपालिकाका प्रमुख प्रशासकीय अधिकृत उदय शङ्कर चौधरीले पनि पूर्वमन्त्री आलमप्रति श्रद्धाञ्जलि अर्पण गर्दै नगरपालिकाका सबै कार्यालयहरूमा आइतबार शोक बिदा रहने जनाएका छन्।
यसैबीच, नेपाल निजामती कर्मचारी युनियन (संघ)ले पनि एक विज्ञप्ति जारी गरी नेता आलमको निधनमा गहिरो दुःख व्यक्त गर्दै शोकाकुल परिवारप्रति समवेदना र दिवङ्गत आत्माको चिरशान्तिको कामना गरेको छ।
