मनहरी, मंसिर २५ गते । करिब तीन दशकदेखि माओवादी आन्दोलनमा सक्रिय भूमिका खेल्दै आएका माओवादी केन्द्रका नेता तथा मनहरी गाउँ समिति (पूर्व मनहरी गाउँ समिति) का तत्कालीन अध्यक्ष आनन्द घलान (वीरबहादुर) ले पार्टी परित्याग गरेका छन्।
उनले मंसिर २५ गते जारी गरेको प्रेस विज्ञप्तिमार्फत नेपाल कम्युनिस्ट पार्टी (माओवादी केन्द्र) को साधारण सदस्यता तथा सबै जिम्मेवारीबाट मुक्त रहँदै स्वतन्त्र राजनीतिक यात्रामा अघि बढ्ने घोषणा गरेका हुन्।
घलानले जनयुद्धकालदेखि रूपान्तरणको सम्पूर्ण चरणमा आफूले सक्दो योगदान गरेको उल्लेख गर्दै पार्टीको हालको नीतिहरू जनआकांक्षा र जनयुद्धका मर्मबाट क्रमशः टाढिँदै गएको महसुस भएको बताएका छन्। विचार, सिद्धान्त र व्यवहारबीच बढ्दो दूरीले फरक मार्ग रोज्न बाध्य भएको उनको भनाइ छ।
“मेरा लागि राजनीति व्यक्तिगत पद वा लाभका लागि होइन। देश, जनता र इतिहासले दिएको जिम्मेवारी पूरा गर्ने सत्यनिष्ठा नै मूल प्रेरणा हो,” विज्ञप्तिमा उनले उल्लेख गरेका छन्।
घलानले पार्टी नेतृत्व, सहकर्मी र जनताले देखाएको विश्वास र साथका लागि कृतज्ञता व्यक्त गर्दै आगामी दिनहरूमा पनि सद्भावना पाउने आशा व्यक्त गरेका छन्।
