चितवन, मंसिर २८ गते। रत्ननगर नगरपालिकाको आर्थिक सहयोग मा नेत्रहीन युवा संघ नेपाल, जिल्ला शाखा चितवनले आयोजना गरेको अपाङ्गता भएका युवाहरूको रोजगारी संयोजन तथा सक्षमता प्रदर्शन कार्यक्रम सफलतापूर्वक सम्पन्न भएको छ।
मङ्सिर २६ र २७ गते दुई दिनसम्म सञ्चालित कार्यक्रममा नगरभित्रका विभिन्न अपाङ्गता भएका युवा तथा रोजगारदाताका रूपमा संघसंस्था र व्यवसायी व्यक्तित्वहरूको सहभागिता रहेको थियो। नगर प्रमुख प्रहलाद सापकोटाले उद्घाटन गर्नुभएको कार्यक्रमको समापन वडा नम्बर १ का सदस्य गिरिराज लम्सालको प्रमुख आतिथ्यमा संस्थाका अध्यक्ष किरण पन्तले गरेका थिए।
कार्यक्रममा विज्ञहरूले अपाङ्गताको परिचय, रोजगारीको कानुनी व्यवस्था, बैंक तथा वित्तीय संस्थाको भूमिका, स्वरोजगारका लागि पुँजी, सहुलियत र रोजगारीमा अपाङ्गता भएका व्यक्तिहरूको हक, अधिकार र कर्तव्यबारे जानकारी गराएका थिए।
यसै क्रममा रिजाल फुड इन्डस्ट्रीज ले आफ्नो आगामी रोजगारीमा एकजना अपाङ्गता भएका व्यक्तिलाइ समेट्ने प्रतिबद्धतासमेत व्यक्त गरेको छ।
