सिन्धुली, पुस २ गते । सिन्धुलीको गोलन्जोर गाउँपालिका–७ देउराली डाँडास्थित रेस्मा खाजा घरकी सञ्चालक तारा भुजेलमाथि कुटपिट तथा दुर्ववहार भएको छ। मंगलबार राति करिब १० बजेको समयमा सामान बोक्ने ट्रकका चार जना चालकसहितको समूहले कुटपिट तथा दुर्ववहार गरी फरार भएको पीडितले बताएकी छन्।
पीडित भुजेलका अनुसार खाजा घर अगाडि अव्यवस्थित रूपमा सवारी साधन पार्क गरिएको विषयमा गाडी मिलाएर राख्न आग्रह गर्दा चालकहरूले नमानेपछि विवाद सुरु भएको थियो। सोही विवाद चर्किँदै जाँदा चालकसहितको समूहले हातपात तथा दुर्ववहार गरेको बताइएको छ।
घटनापछि भुजेलले आफू असुरक्षित महसुस गरिरहेको बताउँदै दोषीमाथि कडा कानुनी कारबाहीको माग गरेको छ। उता, स्थानीयवासीहरूले सार्वजनिक स्थलमा व्यवसाय गर्ने महिलामाथि भएको यस्तो घटनाले सुरक्षा चुनौती बढाएको भन्दै सम्बन्धित निकायको ध्यानाकर्षण गराएका छन्।
उनीहरूले दोषीको शीघ्र पहिचान गरी कारबाही गर्न र व्यवसायी महिलाको सुरक्षा सुनिश्चित गर्न माग गरेका छन्।
