हेटौंडा, माघ १५ गते । हेटौंडा उपमहानगरपालिकाअन्तर्गत बुद्धचोकदेखि पिपलबोट हनुमान मन्दिरसम्मको सडक खण्डमा सार्वजनिक सवारी व्यवस्थापनमा गम्भीर अव्यवस्था देखिएको छ। विशेषगरी हेटौंडा–काठमाडौँ लक्षित अटो, मयुरी र मोटरसाइकलमा आएका यात्रुलाई “कता जाने ? गाडी यता” भन्दै युवाहरूले तानातान गर्ने दृश्य दैनिक देखिन थालेपछि दुर्घटनाको जोखिम बढ्दै गएको छ।
यस अवस्थाप्रति हेटौंडा उपमहानगरपालिकाका अध्यक्ष तथा सामाजिक अभियान्ता विशाल राज महतले सामाजिक सञ्जालमार्फत गम्भीर ध्यानाकर्षण गराएका छन्। उनले यात्रु तानातान गर्ने गतिविधिले सडकमा अव्यवस्था मात्र होइन, असभ्य समाजको चित्र समेत प्रस्तुत गरिरहेको उल्लेख गरेका छन्।
नजिकै ट्राफिक प्रहरीको उपस्थिति हुँदाहुँदै पनि अवस्था नियन्त्रणबाहिर देखिनु झनै चिन्ताजनक भएको महतको भनाइ छ। सबैलाई रोजिरोटी आवश्यक भए पनि संयम, सभ्यता र जोखिमरहित तरिकाले काम गर्नु सबैको दायित्व भएको उनले स्पष्ट पारेका छन्।
उनले जिल्ला ट्राफिक प्रहरी कार्यालय, जिल्ला प्रहरी कार्यालय तथा हेटौंडा उपमहानगरपालिकालाई प्रत्यक्ष सम्बोधन गर्दै यो अव्यवस्था कसले र कहिले रोक्ने भन्ने प्रश्न उठाएका छन्। दुर्घटना भएपछि मात्र चेत खुल्ने कि अहिले नै जिम्मेवारी लिने भन्ने उनको चेतावनीमूलक टिप्पणी छ।
स्थानीयवासीहरूका अनुसार यस प्रकारको अव्यवस्था लामो समयदेखि रहँदै आएको छ। सम्बन्धित निकायले समयमै चासो नदिए ठूला दुर्घटना हुन सक्ने जोखिम उच्च रहेको भन्दै तत्काल अनुगमन, कडाइ र व्यवस्थित यातायात व्यवस्थापनको माग गरिएको छ।
