काठमाडौँ, फागुन १२ गते । प्रेस काउन्सिल नेपालले आगामी प्रतिनिधिसभा सदस्य निर्वाचनको सन्दर्भमा पत्रकार तथा सञ्चारकर्मीलाई पेशागत मर्यादामा रही कर्तव्य पालन गर्न आग्रह गरेको छ। काउन्सिलले कतिपय पत्रकार तथा सञ्चारकर्मीले सामाजिक सञ्जालमार्फत कुनै दल विशेष वा उम्मेदवारको पक्षमा प्रचारप्रसार गर्ने, मत दिन आह्वान गर्ने तथा विपक्षमा नकारात्मक टिप्पणी र दुष्प्रचार गर्ने सामग्री निरन्तर प्रसारण गरेको पाइएको जनाएको छ।
२०८२ साल फागुन २१ गते हुने प्रतिनिधिसभा सदस्य निर्वाचनलाई लक्षित गरी सामाजिक सञ्जालमा देखिएको यस्ता गतिविधिप्रति काउन्सिलको गम्भीर ध्यानाकर्षण भएको हो। पत्रकार आचारसंहिता २०७३ को दफा १४ अनुसार पत्रकार तथा सञ्चार माध्यमले प्रयोग गर्ने सामाजिक सञ्जालमा प्रकाशित सामग्रीको प्रकृति अध्ययन र अनुगमन गर्न सकिने व्यवस्था छ। सोही आधारमा काउन्सिलले आचारसंहिताको विशेष अनुगमन गर्दै पत्रकारले प्रयोग गर्ने सामाजिक सञ्जालको प्रवृत्तिगत अध्ययन गरिरहेको जनाएको छ।
अनुगमनका क्रममा पत्रकार आचारसंहिता २०७३ को दफा ४(३), ४(६) तथा निर्वाचन आचारसंहिता २०८२ को दफा २५(१) (ख), (च) र (ठ) उल्लङ्घन हुने गरी कुनै दल विशेष वा उम्मेदवारको एकपक्षीय प्रचारप्रसार, मत दिन आह्वान गर्ने पोस्ट सेयर, अपिल, कमेन्ट, लाइभ स्ट्रिमिङ, ट्याग र मेन्सनमार्फत सन्देश प्रवाह गर्ने प्रवृत्ति बढ्दै गएको काउन्सिलको निष्कर्ष छ।
यस्ता गतिविधिमा संलग्न केही पत्रकार तथा सञ्चारकर्मीविरुद्ध निर्वाचन आयोगमा समेत उजुरी परेका र त्यहाँबाट अनुगमन तथा कारबाहीका लागि काउन्सिललाई पत्राचार भइसकेको जनाइएको छ। आचारसंहिता प्रतिकूल देखिएका पत्रकार तथा सञ्चारकर्मीलाई काउन्सिलले नोटिसमार्फत सचेत गराइसकेको पनि उल्लेख गरिएको छ।
निर्वाचनलाई स्वच्छ, स्वतन्त्र, मर्यादित र निष्पक्ष रूपमा सम्पन्न गर्न आम सञ्चार माध्यम र पत्रकारले तटस्थ भूमिका निर्वाह गर्नु सबैको जिम्मेवारी भएको काउन्सिलले स्पष्ट पारेको छ। निर्वाचनजस्तो संवेदनशील समयमा कुनै दल वा उम्मेदवारको पक्षमा मत माग्ने अपिल गर्ने, द्वेषपूर्ण अभिव्यक्ति, मिथ्या सूचना तथा भ्रामक टिप्पणीलाई स्थान दिने, सामाजिक सञ्जालमा सेयर वा स्पोन्सर्ड सामग्रीमार्फत प्रचार गर्ने कार्यले पत्रकारिता क्षेत्रको विश्वसनीयतामा गम्भीर असर पर्ने काउन्सिलको ठहर छ।
यसैबीच, प्रेस काउन्सिल नेपालका सह–प्रशासकीय अधिकृत तथा सहप्रवक्ता सूचना अधिकारी रामशरण बोहराले पत्रकार, सञ्चारकर्मी तथा सम्बद्ध सबै पक्षलाई पेशागत मर्यादा, जिम्मेवारी र उत्तरदायित्वको पूर्ण ख्याल गर्न पुनः अपिल गरेका छन्।
प्रेस काउन्सिल नेपालले निकालेको विज्ञप्ति यस्तो छ हेर्नुहोस्।
