हेटौँडा,बैशाख ३१ गते । हेटौँडा उपमहानगरपालिका–४ नम्बर वडा कार्यालयले आफ्नो वडाभित्र रहेका सामुदायिक तथा संस्थागत विद्यालयका विद्यार्थीलाई लक्षित गर्दै सीपमूलक तालिम सञ्चालन गरेको छ ।
वडाका विभिन्न विद्यालयमा अध्ययनरत कक्षा ९ का ७५ जना विद्यार्थीलाई व्यवसायिक सीप प्रदान गर्ने उद्देश्यले कपाल काट्ने (हेयर कटिङ), व्युटी पार्लर तथा इलेक्ट्रिक सम्बन्धी तालिम सुरु गरिएको हो । उक्त तालिमको संयुक्त रूपमा बिहीबार उद्घाटन गरिएको छ ।
कार्यक्रमका प्रमुख अतिथि तथा वडा अध्यक्ष नवीन सिग्देलले विद्यार्थीलाई विद्यालय तहदेखि नै सीपसँग जोड्न आवश्यक रहेको बताए । उनले पढाइसँगै व्यवहारिक र व्यवसायिक ज्ञानले भविष्यमा आत्मनिर्भर बन्न सहयोग पुग्ने उल्लेख गर्दै सामुदायिक र संस्थागत विद्यालयका विद्यार्थीलाई समेटेर तालिम सञ्चालन गरिएको जानकारी दिए ।
उनका अनुसार जेठ र असार महिनाभर शनिबार र आइतबारको सार्वजनिक बिदाका दिन तालिम सञ्चालन गरिनेछ ।
कार्यक्रममा भुटनदेवी माध्यमिक विद्यालयका प्रधानाध्यापक सूर्य प्रसाद घिमिरेले वडा कार्यालयले सञ्चालन गरेको सीपमूलक कार्यक्रम महत्वपूर्ण र उदाहरणीय रहेको बताए । उनले तालिमलाई प्रभावकारी र उपयोगी बनाउन विद्यार्थीलाई सिकेका सीप व्यवहारमा उतार्न आग्रह गरे ।
कार्यक्रमका सभाध्यक्ष तथा शैक्षिक गुणस्तर सुधार समितिका अध्यक्ष एवं श्रमिक माध्यमिक विद्यालयका प्रधानाध्यापक श्रीराम दाहालले यस्ता प्रकारका कार्यक्रम देशमै नयाँ अभ्यास हुन सक्ने बताए । उनले विद्यार्थीहरूमा तालिम प्रति उत्साहजनक चासो देखिएको उल्लेख गरे ।
उद्घाटन कार्यक्रममा वडा कार्यालयका सचिव राम प्रसाद गुरागाईं, भुटनदेवी माविका सह-प्रधानाध्यापक भरत पोखरेल, वेदराज कोइराला तथा प्रशिक्षकहरूको समेत उपस्थिति रहेको थियो ।
