इलाम। इलामको सूर्योदय नगरपालिका–१ भालुखोकमा गएराति छुरा प्रहारबाट २२ वर्षीय एक युवकको हत्या भएको छ। हत्या हुनेमा २२ वर्षीय निरोज चापागाईं रहेका छन्। घटनामा निरोजका भाइ प्रकाश चापागाईं पनि घाइते भएका छन्।
जिल्ला प्रहरी कार्यालय इलामका अनुसार, निरोजको ससुराली नजिकै सोही क्षेत्रका ३३ वर्षीय किरण शेर्पाले धारिलो हतियारले आक्रमण गरेका थिए। प्रहरी नायब उपरीक्षक (डीएसपी) मान बहादुर राईले दिएको जानकारी अनुसार, घाइते प्रकाशको झापाको विर्तासिटी अस्पतालमा उपचार भइरहेको छ र उनको अवस्था सामान्य रहेको छ।
घटनाका आरोपी किरण शेर्पा पनि घाइते भएका छन् र उनको उपचार इलामकै स्वास्थ्य संस्थामा भइरहेको प्रहरीले जनाएको छ। प्रारम्भिक अनुसन्धानबाट मृतक निरोज चापागाईं वडा नम्बर २ का र आरोपी शेर्पा वडा नम्बर १ का स्थानीय भएको र उनीहरूबीच पहिलेदेखि नै चिनजान रहेको खुलेको छ।
हत्याको कारण र कसरी घटना भयो भन्ने विषयमा भने अनुसन्धान जारी रहेको डीएसपी राईले बताएका छन्।
