हेटौंडा, भदौ २४ गते । मकवानपुरका सामाजिक अभियन्ता विशाल राज महतले हालै सामाजिक सञ्जालमार्फत जारी गरेको आफ्नो भनाइमा सरकारको हिंसात्मक रवैयाप्रति आक्रोश पोख्दै निर्णायक आन्दोलनको आवश्यकता रहेको बताएका छन्। उनले भने, “यो बर्बरताको पराकाष्ट हो, चुप लागेर बस्ने अवस्था छैन। सामान्य मानिसले समेत यस्तो गर्दैन। यी मानसिक रोगीहरूको उपचार अब गर्नुपर्छ। यो मुद्दा सबै नेपालीको साझा मुद्दा हो, यसको विरुद्ध बोलिन्छ।”
महतका अनुसार मौन रहनुले अन्यायलाई बलियो बनाउँछ भने बोल्न सक्दा परिवर्तन सम्भव हुन्छ। उनले तानाशाही सरकारलाई मुर्दाबाद भन्दै नागरिकलाई सचेत हुन आह्वान गरेका छन्।
त्यस्तै, रेडियो भरोसासँगको विशेष कुराकानीमा उनले गृहमन्त्री रमेश लेखकको तत्काल राजीनामा आवश्यक रहेको उल्लेख गर्दै भने, “नैतिकताको आधारमा भएपनि गृहमन्त्रीले राजीनामा दिनुपर्छ। नयाँ पुस्ता जेन जि ले गरेको शान्तिपूर्ण विरोध जनसभामाथि समेत सरकारले हिंसक हस्तक्षेप गरेको छ। अहिलेको सरकारले निरीह र क्रूर रूप धारण गरिसकेको छ।”
महतले मकवानपुरमा भएको आन्दोलन नेतृत्वविहीन भएको टिप्पणी गर्दै नेतृत्वविहीन आन्दोलनले ठोस दिशा दिन नसक्ने बताए। उनका अनुसार हरेक आन्दोलनमा सक्षम नेतृत्व जरुरी हुन्छ, जसले आन्दोलनलाई निश्चित लक्ष्यतर्फ डोर्याउन सक्छ।
उनले थपे, “भोलिका दिनहरूमा जेन जि पुस्ताले आवश्यक माग अघि सारेका खण्डमा हामी अवश्य समर्थन र साथ दिन तयार छौँ। आवश्यक परेमा हामी आन्दोलनको नेतृत्व तहमा पनि जिम्मेवारी लिन तयार छौँ।”
