काठमाडौं, अशोज २९ । हमासले दुई वर्षअघि इजरेलबाट बन्धक बनाएर लगेका नेपाली विद्यार्थी विपिन जोशीको मृत्यु भएको समाचार सार्वजनिक भएको दुई दिनपछि काठमाडौंको माइतीघर मण्डलामा बुधबार साँझ दीप प्रज्वलन गरी उनलाई श्रद्धाञ्जली अर्पण गरिएको छ।
कार्यक्रममा उनका सहपाठी, मित्र, परिवारका सदस्य तथा सर्वसाधारण सहभागी भएर जोशीको सम्झनामा दीप बाल्दै शोक व्यक्त गरेका थिए। उपस्थितहरूले जोशीको आत्माको चिरशान्तिको कामना गर्दै निर्दोष नागरिकमाथि भएको आक्रमण र हिंसाको विरोध जनाएका थिए।
विपिन जोशी २०२३ अक्टोबरमा इजरेलमा अध्ययनका लागि गएका बेला हमासको आक्रमणपछि बेपत्ता भएका थिए। पछिल्लो हप्तामा इजरेली पक्षले उनी मृत फेला परेको पुष्टि गरेको थियो।
जोशीको शव यसै साता नेपाल आइपुग्ने अपेक्षा गरिएको पारिवारिक स्रोतले जनाएको छ। सरकारले शव ल्याउने प्रक्रिया अघि बढाएको र आवश्यक कागजी कार्य पूरा हुँदै गएको बताइएको छ।
