काठमाडौँ, मंसिर १५ गते । चुनावी सरकारका तीन मन्त्रालय सम्हालिरहेका कुलमान घिसिङले पद कायम राख्दै चुनावी प्रतिस्पर्धामा उत्रिने संकेत दिएपछि नयाँ राजनीतिक तरंग उत्पन्न भएको छ। उनी मन्त्री पदमै रहँदै निर्वाचनमैदानमा प्रवेश गर्न खोजिरहेको भन्दै जेन जि मुभमेन्ट नेपालले कठोर प्रतिक्रिया व्यक्त गरेको छ।
मुभमेन्टले सोमबार सार्वजनिक गरेको वक्तव्यमा घिसिङको कदम “लोकतान्त्रिक आचरण र राजनीतिक नैतिकतामाथि खुला प्रहार” भएको आरोप लगाइएको छ। मन्त्रीको हैसियतलाई ढाल बनाएर चुनावमा उत्रिन खोज्नु, आन्दोलनमा रगत बगाएका नयाँ पुस्ताको बलिदानमाथिको अपमान भएको जनाइएको छ।
यता, प्रधानमन्त्री सुशीला कार्कीले “कुलमान घिसिङ नभएको भए सरकार नै चल्दैनथ्यो” भन्ने भनाइले पनि सरकारको निर्भरता र सत्ताको अस्वस्थ अभ्यास झल्किएको मुभमेन्टको आरोप छ।
मुभमेन्टले घिसिङविरुद्ध अख्तियार दुरुपयोग अनुसन्धान आयोगमा दर्ता भएको भनिएको भ्रष्टाचारसम्बन्धी मुद्दाहरू र भारतसँग गरिएको ४३ करोड रुपैयाँ बराबरको राष्ट्रिय क्षति हुनेगरी भएको विद्युत् सम्झौता पनि सार्वजनिक गर्दै—“यिनै कारणले घिसिङले मन्त्री पदमा बसिरहन कुनै नैतिकाधिकार छैन”—भनेर जोड दिएको छ।
कुलमान घिसिङलाई तत्काल बर्खास्त गर्न तथा “मन्त्री पदको दुरुपयोग गरेर चुनावी प्रक्रिया कब्जा गर्ने प्रयास” रोक्न राज्य संयन्त्र सक्रिय हुनुपर्ने मुभमेन्टको माग छ। साथै, जेन जि विद्रोहका नाममा सुशीला कार्की नेतृत्वको सरकारले नैतिक वैधता गुमाइसकेको आरोप पनि वक्तव्यमा गरिएको छ।
अन्त्यमा मुभमेन्टले देशमा कुशासन, सत्ता कब्जा र अनैतिक राजनीतिक चलनको अन्त्य गर्दै नयाँ पुस्ताको बलिदानबाट नयाँ युगको सुरुवात हुने चेतावनी जारी गरेको छ।
