हेटौंडा, भदौ १८ गते । हेटौंडा उपमहानगरपालिका–४ का वडाध्यक्ष नवीन सिग्देलले सामाजिक सञ्जाल मार्फत आफूहरू कर्तव्यबाट विचलित नभएको भन्दै पछिल्लो गतिविधि र आलोचनाप्रति कडा प्रतिक्रिया जनाएका छन्।
वडाध्यक्ष सिग्देलले फेसबुकमा स्टाटस लेख्दै नगर, वडा कार्यालय, स्वास्थ्य केन्द्र तथा घरहरूमा आगजनी गर्ने र त्यसपछि सामाजिक सञ्जाल मार्फत परिवार तथा आफन्तले समेत हेर्न नसक्ने गरी गालीगलौज गर्ने प्रवृत्तिप्रति असन्तुष्टि व्यक्त गरेका छन्।
उनले आफूहरू भने आगजनीपछि बाँकी रहेको खरानीमाथि टेकेर, फुटेका सिसा तथा जलेका सामग्री व्यवस्थापन गर्दै पुनः काममा जुटिरहेको उल्लेख गरेका छन्। विपरीत परिस्थितिका बाबजुद पनि आफूहरू आफ्नो कर्तव्यबाट विचलित नभएको उनको भनाइ छ।
सिग्देलले अपराध र राजनीति सँगसँगै अघि बढ्न नसक्ने दाबी गर्दै अपराधमा संलग्नहरूलाई उन्मुक्ति नहुने चेतावनी समेत दिएका छन्।
‘झुटो टिक्दैन, सत्य डग्दैन’ भन्दै उनले सत्य कसैको मत वा सामाजिक सञ्जालमा हुने प्रचारबाट नभई कर्मबाट पहिचान हुने बताएका छन्।
उनको फेसबुक स्टाटसमा भनिएको छ, “सत्य मतले होइन, कर्मले छुट्याउँछ।” साथै उनले आफूहरूले गरेका काम र अवस्थाका बारेमा बाँकी तस्वीरहरूले नै वास्तविकता बोल्ने उल्लेख गरेका छन्।
वडाध्यक्ष सिग्देलको उक्त अभिव्यक्ति पछिल्लो समय सामाजिक सञ्जालमा देखिएको आरोप–प्रत्यारोप र स्थानीय तहका संरचनामा भएको क्षतिपछिको पुनःस्थापना कार्यप्रतिको उनको धारणा सार्वजनिक गर्ने प्रयासका रूपमा आएको देखिन्छ।
