हेटौँडा, मंसिर २४ गते । समाजवादी जेन्जी फोर्स मकवानपुरले हालै जारी गरेको प्रेस विज्ञप्तिमा जेन जि आन्दोलनमा सहभागी युवामाथि भइरहेको ‘एकतर्फी दमन’ तत्काल रोक्न माग गरेको छ। संस्थाले महान जेन जि आन्दोलनका सहिदहरूप्रति श्रद्धाञ्जली अर्पण गर्दै घाइतेहरूलाई सम्मान व्यक्त गरेको छ।
विज्ञप्तिमा जेन्जी आन्दोलनको बलिदानका आधारमा बनेको संगठन भ्रष्टाचाररहित सुशासनका पक्षमा सधैं दृढ रहेको उल्लेख गर्दै, आन्दोलनका क्रममा भएका घटनाहरूलाई संस्थागत रूपमा सम्हाली नरसंहारकारी अपराधीलाई कानूनी प्रक्रियामा ल्याउन आग्रह गरिएको छ।
जेन जि फोर्सले आन्दोलनमा संलग्न भएको आरोपमा गरिएका गिरफ्तारीलाई अन्यायपूर्ण भन्दै जघन्य अपराध बाहेकका सबै कैदीबन्दी जेन जि समर्थकलाई तत्काल रिहाइ गर्न सरकारसँग माग गरेको छ।
२०८२ भदौ २४ गतेको घटनासँग सम्बन्धित मामिलामा मकवानपुर जिल्ला अदालतको आदेशपछि हेटौडा–११ का सुजन अधिकारी र सुरेन्द्र राणा मगरलाई थप अनुसन्धानका लागि भीमफेदी कारागार पठाइएको उल्लेख छ। त्यस्तै, जिल्ला प्रशासन कार्यालयले धरौटीमा छाडेपछि पनि जेन जि समर्थक सागर घतानीलाई पुनः प्रहरीले गिरफ्तार गरेको र बक्सर भनिने व्यक्तिलाई पनि हिरासतमा राखिएको फोर्सले जनाएको छ।
फोर्सले घटनाको मुख्य कारकलाई बेवास्ता गरेर केवल सहभागी युवामाथि कारबाही गर्नु न्यायसंगत नभएको बताएको छ। आन्दोलनका क्रममा भएका चोरी, डकैती, लुटपाट र हातहतियार कब्जा जस्ता गम्भीर मुद्दाबाहेकका अन्य घटनालाई आममाफी दिनुपर्ने विज्ञप्तिमा उल्लेख छ।
आन्दोलनलाई संस्थागत गर्दै न्यायिक समाधान खोज्न सबै पुस्ता र समर्थकलाई एकताबद्ध हुन अपील गर्दै, आफ्नो माग तत्काल संबोधन गर्न सम्बन्धित निकायको ध्यानाकर्षण गराइएको छ।
