काठमाडौं, पुस १ गते । नेकपा एमालेको नेतृत्व चयनका लागि तय गरिएको मतदान प्रक्रिया अन्तिम समयमा आएर स्थगित भएको छ। आज साँझबाट मतदान सुरू हुने कार्यतालिका रहे पनि प्राविधिक तयारी अपूरो र चिसो मौसमका कारण प्रक्रिया एक दिन पछाडि धकेलिएको हो।
पार्टी महासचिव शंकर पोखरेलले विद्युतीय माध्यमबाट हुने मतदानको प्राविधिक परीक्षण गर्न थप समय आवश्यक परेको जनाउँदै आजका लागि मतदान स्थगित गरिएको जानकारी दिए। उनका अनुसार अब मतदान भोलि (बुधबार) बिहान ८ बजेदेखि सुरू हुनेछ।
यसअघि केन्द्रीय निर्वाचन आयोगले साँझ ७ बजेदेखि मतदान सुरू हुने तालिका सार्वजनिक गरेको थियो। सोही अनुसार प्रतिनिधिहरू साढे ६ बजेदेखि नै मतदान स्थलमा लाइनमा बसेका थिए। अध्यक्षका आकांक्षी केपी शर्मा ओली र ईश्वर पोखरेल पनि मतदानमा सहभागी हुन भृकुटीमण्डप पुगिसकेका थिए।
अध्यक्ष पदका लागि ओली र पोखरेल समूहले छुट्टाछुट्टै प्यानल बनाएर प्रतिस्पर्धा गरिरहेका छन्। मतदान स्थगित भएपछि प्रतिनिधिहरू फर्किएका छन् भने अब सबैको ध्यान भोलि बिहान सुरू हुने निर्वाचन प्रक्रियातर्फ केन्द्रित भएको छ।
