सुनसरी, पुस १७ गते । सशस्त्र प्रहरीको गोली लागेर स्थानीय युवक विजय साहको ज्यान गएपछि उत्पन्न तनाव नियन्त्रणतर्फ उन्मुख भएको छ। प्रशासन र पीडित पक्षबीच बिहीबार जिल्ला प्रशासन कार्यालयमा भएको सर्वपक्षीय छलफलबाट घटनाको सत्यतथ्य पत्ता लगाउने र पीडित परिवारलाई राहत दिने विषयमा पाँच बुँदे सहमति जुटेको हो।
सहमतिअनुसार घटनाको निष्पक्ष र पारदर्शी छानबिनका लागि उच्चस्तरीय समिति गठन गरिनेछ। साथै मृतक साहको परिवारलाई उपयुक्त आर्थिक क्षतिपूर्ति उपलब्ध गराइने र परिवारका एक सदस्यलाई रोजगारीको व्यवस्था गर्ने प्रतिबद्धता गरिएको छ। दोषी देखिएका व्यक्तिलाई कानुनी दायरामा ल्याई पीडितलाई न्याय दिलाइने विषयमा पनि दुवै पक्ष सहमत भएका छन्।
घटना बिहीबार बिहान करिब १ बजे भएको हो। भारतबाट सिटी सफारीमार्फत सामान ल्याउँदै गरेका विजय साहमाथि सशस्त्र प्रहरीले गोली प्रहार गरेको थियो। गोली लागेर गम्भीर घाइते भएका साहको उपचारका क्रममा मृत्यु भएपछि स्थानीयस्तरमा आक्रोश फैलिएको थियो। त्यसपछि भएको प्रदर्शनका क्रममा प्रदर्शनकारी र सुरक्षाकर्मीबीच झडप हुनुका साथै सीमा सुरक्षा पोष्टमा तोडफोडसमेत भएको थियो।
प्रशासनसँगको सहमतिपछि आन्दोलन क्रमशः साम्य हुने र मृतकको शव व्यवस्थापन प्रक्रिया अगाडि बढ्ने अपेक्षा गरिएको छ। प्रशासनले शान्ति–सुरक्षालाई प्राथमिकतामा राख्दै सहमतिका बुँदाहरू प्रभावकारी रूपमा कार्यान्वयन गर्ने प्रतिबद्धता जनाएको छ।
