हेटौंडा, माघ १५ गते । सेवा, सहयोग र आवाजमा हामीका अध्यक्ष तथा सामाजिक अभियन्ता विशाल राज महतले कलियुगको सामाजिक यथार्थप्रति गम्भीर चिन्ता व्यक्त गर्दै फटाहा, चालाक र स्वार्थी प्रवृत्तिहरूले अस्थायी रूपमा जितेजस्तो देखिए पनि त्यसको मूल्य सम्पूर्ण समाजले तिर्नुपर्ने बताएका छन्।
आफ्नो सामाजिक सञ्जालमार्फत सार्वजनिक गरिएको स्टाटसमा उनले धर्मग्रन्थमा उल्लेखित चार युगमध्ये कलियुगलाई अन्तिम युगका रूपमा व्याख्या गर्दै यस युगमा धर्म कमजोर हुने र सत्यभन्दा चालाकी हाबी हुने उल्लेख गरेका छन्। उनका अनुसार सत्य, धैर्य र न्यायको मार्गमा हिँड्नेहरू प्रायः एक्लिन्छन् भने मीठा बोली, सजिला वाचा र खोक्रा आश्वासन दिनेहरू भीडको समर्थन पाउन सफल हुन्छन्।
महत्वपूर्ण सन्देशका रूपमा उनले एउटा रूपक कथा प्रस्तुत गर्दै सत्यवादी र चालाक व्यक्तिको उदाहरण दिएका छन्। कथामा चालाक व्यक्तिले तत्काल समाधानको भ्रम सिर्जना गरी सत्ता हासिल गरे पनि अन्ततः राज्य अन्याय र अव्यवस्थाले भरिएको देखिन्छ। त्यही सन्दर्भमा उनले सत्य दबाइएपछि समाज दीर्घकालीन संकटतर्फ धकेलिने चेतावनी दिएका छन्।
अन्त्यमा महतले कलियुगमा सत्यको पराजय भएको जस्तो देखिए पनि धर्मको कसीमा सत्य नै अमर रहने उल्लेख गर्दै समाजलाई विवेक, धैर्य र सत्यको पक्षमा उभिन आह्वान गरेका छन्। उनका अनुसार आजको समाजलाई देखिने जितभन्दा दीर्घकालीन मूल्य र नैतिकताको खाँचो छ।
