हेटौँडा, माघ १९ गते । जिल्ला मकवानपुरको मनहरी गाउँपालिका–९ ज्यामिरेबाट प्रहरीले १० किलो १२४ ग्राम लागूऔषध गाँजासहित तीन जनालाई पक्राउ गरेको छ।
आज करिब ४ः३० बजेको समयमा विशेष सूचनाका आधारमा इलाका प्रहरी कार्यालय मनहरीबाट खटिएको प्रहरी टोलीले उक्त स्थानमा रोकी राखिएको UP32FF0055 नम्बरको भारतीय कारलाई जाँच गरेको थियो। शंका लागी रित पूर्वक खानतलासी गर्ने क्रममा कारको डिक्कीमा लुकाई छिपाई राखिएको अवस्थामा १० किलो १२४ ग्राम गाँजा फेला परेको प्रहरीले जनाएको छ।
प्रहरीका अनुसार कार चालक भारत उत्तर प्रदेश मुजफ्फरनगर जिल्ला सिखेडा कवल निवासी २३ वर्षीय मुसिर रहेका छन्। सोही गाडीमा सवार भारत उत्तर प्रदेश मुजफ्फरनगर निवासी २४ वर्षीय मौ जुबेर तथा बिहार राज्य अम्बा निवासी ४४ वर्षीया साबीरा पनि पक्राउ परेका छन्।
बरामद गरिएको लागूऔषध गाँजा तथा सवारी साधन नियन्त्रणमा लिई तीनै जनालाई पक्राउ गरी लागूऔषध मुद्दामा थप अनुसन्धान कार्य भइरहेको जिल्ला प्रहरी कार्यालय मकवानपुरले जनाएको छ।
