हेटौंडा , भदौ १६ गते । पृथ्वीराजमार्गअन्तर्गत धादिङको कृष्णभीरमा सडक अवरुद्ध भएपछि मकवानपुरको हेटौंडा हुँदै काठमाडौं जाने–आउने सडकखण्डमा सवारी चाप बढेको छ। सडक अवरुद्ध भएसँगै वैकल्पिक मार्गका रूपमा हेटौंडा–काठमाडौं सडक प्रयोग गर्ने सवारीसाधनको संख्या बढ्दा हेटौंडा क्षेत्रमा समेत आवागमन प्रभावित भएको हो।
बिहानैदेखि सुरु भएको सवारी जाम दिउँसोपछि झनै बढ्दै गएको छ। सवारीसाधनको अत्यधिक चापका कारण हेटौंडा हुँदै काठमाडौं जाने तथा काठमाडौंबाट हेटौंडातर्फ आउने यात्रुले सास्ती व्यहोर्नुपरेको छ।
पृथ्वीराजमार्गको कृष्णभीर क्षेत्रमा सडक अवरुद्ध भएपछि त्यसको प्रत्यक्ष प्रभाव हेटौंडा क्षेत्रमा परेको जिल्ला प्रशासन कार्यालय मकवानपुरले जनाएको छ। सडकमा सवारीको चाप बढेसँगै सम्भावित थप समस्या र यात्रुको असहजतालाई मध्यनजर गर्दै प्रशासनले अत्यावश्यक कामबाहेक यात्रा नगर्न आग्रह गरेको छ।
प्रशासनले सडकको अवस्था सामान्य नभएसम्म अनावश्यक यात्रा नगरी सुरक्षित स्थानमा रहन तथा यात्रा गर्नैपर्ने अवस्था भएमा सम्बन्धित निकायबाट सडकको अवस्थाबारे जानकारी लिएर मात्र अघि बढ्न अनुरोध गरेको छ।
कृष्णभीरमा अवरुद्ध सडक खुलाउने प्रयास भइरहे पनि सडक पूर्ण रूपमा सञ्चालनमा नआएसम्म हेटौंडा–काठमाडौं सडकखण्डमा सवारी चाप कायमै रहन सक्ने देखिएको छ। यात्रु तथा चालकलाई धैर्य अपनाउन र ट्राफिक व्यवस्थापनमा सहयोग गर्न समेत आग्रह गरिएको छ।
