काठमाडौं, चैत १४ गते । विश्व क्रिकेटकै सबैभन्दा लोकप्रिय फ्रेन्चाइज प्रतियोगिता इन्डियन प्रिमियर लिग (आईपीएल) २०२६ आजदेखि औपचारिक रूपमा सुरु भएको छ। प्रतियोगिताको उद्घाटन खेलमा साविक विजेता रोयल च्यालेन्जर्स बेंगलुरु र सनराइजर्स हैदराबाद बीच प्रतिस्पर्धा हुँदैछ।
बेंगलुरुस्थित एम चिन्नास्वामी स्टेडियममा हुने उक्त खेल नेपाली समयअनुसार बेलुका ७:४५ बजेदेखि सुरु हुनेछ। यस सिजनमा बेंगलुरुको कप्तानी रजत पाटिदारले सम्हाल्नेछन् भने हैदराबादका लागि इशान किशनले निमित्त कप्तानको जिम्मेवारी निर्वाह गर्नेछन्।
प्रतियोगिता दुई चरणमा सञ्चालन हुने तालिका रहेको छ। पहिलो चरण चैत १५ गतेदेखि चैत २९ गतेसम्म सञ्चालन हुनेछ, जसमा कुल २० खेल खेलाइनेछन्। त्यसपछि दोस्रो चरण वैशाख १ गतेदेखि जेठ ११ गतेसम्म हुनेछ, जसमा थप ५० खेलहरू आयोजना गरिनेछ।
यस वर्षको प्रतियोगिता भारतका १२ विभिन्न सहरहरूमा खेलाइनेछ। जसमा बेंगलुरु, मुम्बई, चेन्नई, कोलकाता, दिल्ली, अहमदाबाद, हैदराबाद, लखनउ, जयपुर, धर्मशाला, रायपुर र नयाँ चण्डीगढ समावेश छन्।
यस सिजनमा आठ वटा ‘डबल–हेडर’ (एकै दिन दुई खेल) पनि समावेश गरिएको छ। ती खेलहरूमा दिउँसोका खेल नेपाली समयअनुसार ३:४५ बजे र बेलुकीका खेल ७:४५ बजे सुरु हुनेछन्।
