काठमाडौँ,चैत २६ गते । दृष्टिसम्बन्धी अपाङ्गता भएका व्यक्तिहरूलाई प्रविधिमा दक्ष बनाउँदै रोजगारीका अवसरहरू वृद्धि गर्ने उद्देश्यले महालक्ष्मी विकास बैंकको सहयोगमा समावेशी अक्षर र अनुसन्धान (सर्वोदय) ले १० दिने ‘डिजिटल सामग्री उत्पादन, प्रकाशन तथा प्रसारण’ तालिम सुरु गरेको छ।
जुम एप्लिकेसनमार्फत सञ्चालित कार्यक्रमको पहिलो दिन संस्थाका सूचना प्रविधि विभागका सदस्य आशिर्वाद भट्टराईले सहभागीहरूलाई स्वागत गर्दै प्राविधिक सत्रको व्यवस्थापनबारे जानकारी दिए। वि.सं. २०७६ साल देखि अभियानका रूपमा सक्रिय रहँदै २०८० जेठ १४ गते नवलपरासी सुस्तापूर्वमा औपचारिक रूपमा दर्ता भएको यस संस्थाले सुरुवाती चरणमा शिक्षक सेवा आयोग र लोकसेवा आयोगमा सहभागी दृष्टिविहीन प्रशिक्षार्थीहरूका निम्ति लेखन सहयोगी खोज्दै आएकोमा अहिले आफ्नो कार्यक्षेत्र विस्तार गर्दै कम्प्युटर तालिम, लोकसेवा तयारी कक्षाहरू र वित्तीय समावेशीकरणका विविध कार्यक्रमहरू सञ्चालन गरिरहेको कुरा संस्थाका कोषाध्यक्ष सौगात वाग्लेले कार्यक्रम मार्फत जानकारी गराए।
काठमाडौँ र नवलपरासीलाई मुख्य कार्यक्षेत्र बनाएको सर्वोदयले पछिल्लो समय प्रविधि र आत्मनिर्भरतालाई जोडेर २३ जना दृष्टिसम्बन्धी अपाङ्गता भएका व्यक्तिहरूको सहभागितामा यो विशेष तालिम आयोजना गरेको हो। कार्यक्रम मार्फत सहभागीहरूले गुगल डक्स, माइक्रोसफ्ट एक्सेल र आधुनिक आर्टिफिसियल इन्टेलिजेन्स (एआइ) को प्रयोगबारे प्रयोगात्मक जानकारी प्राप्त गर्नेछन्। यसका साथै अडियो एडिटिङ, युट्युब एकाउन्ट निर्माण तथा फेसबुक र टिकटक जस्ता सोसल मिडियामा पहुँचयुक्त कन्टेन्ट क्रिएसन गरी सही ह्याशट्यागका साथ पोस्टिङ्ग गर्ने सीपसमेत प्रदान गरिने विषयमा कोषाध्यक्ष वाग्लेले थप जानकारी दिए।
दृष्टिसम्बन्धी अपाङ्गता भएका व्यक्तिहरूलाई डिजिटल मञ्चमा आत्मनिर्भर बनाउने यो अभियानले उनीहरूको सिर्जनात्मक क्षमतालाई व्यावसायिक रूप दिन र रोजगारीका नयाँ ढोकाहरू खोल्न मद्दत पुग्ने अपेक्षा गरिएको छ।
