हेटौंडा, असार ५ गते । तेस्रो संस्करणको बागमती प्रदेश खेलकुद प्रतियोगिता अन्तर्गत महिला फुटबलतर्फ मकवानपुर सेमीफाइनलमा प्रवेश गरेको छ । शुक्रबार हेटौंडा–५ स्थित पिप्ले–क्याम्पा रंगशालामा सम्पन्न लिग चरणको दोस्रो खेलमा भक्तपुरलाई टाइब्रेकरमा ३–० गोलअन्तरले पराजित गर्दै मकवानपुर अन्तिम चारमा पुगेको हो ।
निर्धारित समयमा दुवै टोलीले १–१ गोलको बराबरी खेलेपछि खेलको निर्णय पेनाल्टी सुटआउटबाट गरिएको थियो । टाइब्रेकरमा मकवानपुरकी गोलरक्षक नायिका बनिन् । भक्तपुरका तीनै खेलाडीले प्रहार गरेका बल उनले उत्कृष्ट रूपमा बचाउ गर्दै टोलीलाई जित दिलाइन् ।
मकवानपुरका लागि सजिना स्याङ्तानले पहिलो हाफको २३औँ मिनेटमा गोल गर्दै टोलीलाई अग्रता दिलाएकी थिइन् । तर भक्तपुरकी जर्सी नम्बर ९ की खेलाडीले २५औँ मिनेटमै गोल फर्काउँदै खेललाई बराबरीमा ल्याएकी थिइन् ।
यसअघि पनि मकवानपुर र भक्तपुरबीच भएको प्रतिस्पर्धा १–१ गोलको बराबरीमा सकिएको थियो । अब मकवानपुरले फाइनल प्रवेशका लागि धादिङ र चितवनबीचको विजेता टोलीसँग प्रतिस्पर्धा गर्नेछ ।
प्रतियोगितामा विजेता, उपविजेता तथा तृतीय स्थान हासिल गर्ने टोलीले ट्रफीसहित नगद पुरस्कार, स्वर्ण, रजत तथा कांस्य पदक र प्रमाणपत्र प्राप्त गर्ने आयोजकले जनाएको छ ।
