पोखरा। पोखरा महानगरपालिका वडा नं. ४ का वडाध्यक्ष देवकृष्ण पराजुलीलाई प्रहरीले पक्राउ गरेको छ। व्यवसायी लेखनाथ सुवेदीले दिएको जाहेरीका आधारमा उनलाई पक्राउ गरिएको प्रहरी स्रोतले जनाएको छ।
वडाध्यक्ष पराजुलीले मंगलबार महानगरपालिकाका दुई व्यक्तिलाई हातपात गरेको आरोप लागेको छ। उनले महानगरपालिकाका प्रमुख प्रशासकीय अधिकृतको कार्यकक्षमै प्रशासन शाखा प्रमुख इश्वरीप्रसाद पोख्रेललाई हातपात गरेका थिए। त्यसैगरी, सोही दिन फुटपाथमा सामान राखेको विषयलाई लिएर उनले व्यवसायी सुवेदीलाई पनि दुर्व्यवहार गर्दै हातपात गरेको बताइएको छ।
वडाध्यक्षको यस्तो व्यवहारपछि महानगरपालिकाका कर्मचारीहरू आन्दोलित भएका थिए र बुधबार उनीहरूले महानगरको सेवा ठप्प पारेका थिए। यसैबीच, हातपातबाट पीडित व्यवसायी सुवेदीले वडाध्यक्ष पराजुलीविरुद्ध प्रहरीमा औपचारिक उजुरी दर्ता गराएका थिए।
सोही उजुरीको आधारमा प्रहरीले थप अनुसन्धान अगाडि बढाउँदै पराजुलीलाई पक्राउ गरेको हो। घटनाको थप विवरण आउन बाँकी छ।
