काठमाडौं, भदौ २३ गते । वरिष्ठ हास्यव्यङ्ग्य कलाकार हरिवंश आचार्यले सामाजिक सञ्जालमार्फत हालको पुस्ताले गर्ने प्रश्नप्रति आफ्नो दृष्टिकोण सार्वजनिक गरेका छन्।
आचार्यले आफ्नै घर छेउको पिच गरिएको बाटो चाँडै भत्किएको उदाहरण दिँदै आफूले लामो समयसम्म मनभित्र मात्र प्रश्न गर्ने बानी रहेको तर अहिलेको पुस्ताले प्रश्नहरू सीधै उठाउने गरेको बताए। उनले भने, “आजको पुस्ता प्रश्न मनभित्र मात्र राख्दैन, बरु खुलाएर सोध्छ— जनताको करले बनेको बाटो किन भत्कियो? यसको जिम्मेवारी कस्को?”
उनका अनुसार, यो आवाज कुनै व्यवस्था वा प्रणालीविरुद्ध होइन, बरु त्यहाँ बसेका जिम्मेवार पदाधिकारी र नेताहरूको कार्यप्रति जनताको प्रश्न हो। उनले जनतालाई अझ धेरै आशा भए पनि सरकारले सो अपेक्षा पूरा गर्न नसकेको उल्लेख गर्दै उमेरअनुसार अब नयाँ पुस्तालाई नेतृत्व हस्तान्तरण गर्नु उत्तम हुने टिप्पणी गरेका छन्।
आचार्यको स्टाटसले सामाजिक सञ्जालमा व्यापक चर्चा पाएको छ। धेरैले यसलाई आजको पुस्ताले देखाएको सजगता र जवाफदेहिताको मागप्रति प्रेरणादायी भनाइका रूपमा लिएका छन्।
