मकवानपुर, भदौ २६ गते । सामाजिक सुधारका लागि चलाइएको जेन्जी आन्दोलनमा अग्रपंक्तिमा रहेकाहरु मध्येका विशालराज महतले बुधबार आफ्नो अनुभव सार्वजनिक गर्दै आन्दोलनले अनपेक्षित विध्वंश भएको स्वीकार गरेका छन्।
महत्वपूर्ण दस्तावेज, सम्पत्ति र विभिन्न स्थानमा भएको तोडफोड र चोरी घटनाबारे उनले भने, “आन्दोलनको मक्सद सरकारको राजीनामा भएको थियो र त्यसपछि आन्दोलन सकिनु पर्ने थियो। तर जेन जीको नाममा केही घुसपैठ भयो, जसले नचाहिँदो क्षति पुर्यायो। हामीले बुझ्न सकेनौं।”
महतले हेटौँडामा भएका लुटपाट र तोडफोडमा मकवानपुर बाहिरका अनुहार देखिएको, भाटभटेनी लगायतका स्थानबाट विभिन्न सामान चोरी भएको पनि स्वीकार गरेका छन् । उनले भने, “आजबाट हाम्रो लागि आन्दोलन सकिएको छ। अब अराजक गतिविधि रोक्नु पर्छ। घुसपैठ भए प्रतिकार गर्न हामी सबै तयार छौँ।”
महतले आन्दोलन सफल भए तापनि नचाहिँदो क्षति भएको र अब हेटौँडालाई फेरि जगाउनुपर्ने बताएका छन्। उनले कर्फ्युको कारण समूहमा जुट्न नसकेको तर साथीहरू जुटेर आगजनी र तोडफोड भएका ठाउँको फोहोर उठाउने, तारका लठ्ठाहरू व्यवस्थित गर्ने अभियान चलाउने योजना रहेको बताए र सबैको सहयोगको आव्हान गरेका छन्।
