काठमाडौँ, अशोज ९ गते । विज्ञान तथा प्रविधि मन्त्री वैज्ञानिक डा. महावीर पुनले प्राविधिक शिक्षा तथा व्यावसायिक तालिम परिषद् (CTEVT) को आजको बैठकबाट तत्काल कार्यान्वयन हुने गरी चार बुँदे निर्देशन दिएका छन्।
मन्त्री पुनले पहिलो चरणमा मौजुदा पाठ्यक्रमलाई सुधार गरी नवप्रवर्तनलाई समावेश गर्ने खाका तयार गरी असोज मसान्तभित्र पेश गर्न निर्देशन दिएका छन्। दोस्रो निर्देशनमा, एकीकृत शैक्षिक क्यालेन्डर तयार गरी परीक्षा परिणाम तीन महिनाभित्र अनिवार्य रुपमा प्रकाशन गर्ने व्यवस्था गर्न परिषद्लाई आग्रह गरेका छन्।
त्यस्तै, तेस्रो निर्देशनका रुपमा विद्यार्थी, अभिभावक तथा शिक्षकका गुनासो सुन्ने र प्राप्त गुनासोलाई अभिलेखिकरण तथा समाधान गर्ने शाखा तुरुन्तै स्थापना गरी सञ्चालनमा ल्याउन भनिएको छ।
चौथो निर्देशन अन्तर्गत २०६९ सालदेखि हालसम्म सम्बन्धनका लागि प्राप्त सम्पूर्ण आवेदन छानबिन गरी असोज मसान्तभित्र प्रतिवेदन पेश गर्ने र सम्बन्धन दिने–नदिने निर्णय तत्काल गर्न परिषद्लाई जिम्मेवारी तोकिएको छ।
मन्त्री पुनले सीटीईभीटीलाई समयानुकूल, पारदर्शी र प्रभावकारी बनाउन यी निर्देशनहरू तत्काल लागू गर्नुपर्ने आवश्यकता औंल्याएका छन्।
